Elordany damytý baǵdarlamasyn júzege asyrý nátıjeleri talqylandy
ASTANA. QazAqparat - Qalalyq máslıhattyń áleýmettik-mádenı damý jónindegi turaqty komıssııasynyń otyrysynda depýtattar Astana qalasyn damytýdyń 2011-2015 jyldarǵa arnalǵan baǵdarlamasyn iske asyrýdyń nátıjelerin talqylady. Bul týraly elordanyń resmı saıty habarlady.
Kezdesý barysynda qurylys, ekologııalyq jaǵdaı, kólik, saýda jáne turǵyn úı-kommýnaldyq sharýashylyq máseleleri qaraldy.
Qalalyq Ekonomıka jáne bıýdjettik josparlaý basqarmasynyń basshysy Álibı Jumaev damý baǵdarlamasyn júzege asyrýdyń nátıjelerin jarııa etti. Onyń atap ótýinshe, qazirgi kezde qalada qoldanystaǵy saýda jáne qyzmet kórsetý salasynda álemge tanymal brendterti keńeıtý boıynsha jumystar belsendi júrgizilip jatyr.
- Búgin Astanada 50-den astam brendti kásiporyn bar, jaqyn arada jańa satý jáne qyzmet kórsetý jelileri ashylady. Kóshe saýdasyn zamanaýı halyqaralyq standarttarǵa keltirý maqsatynda 7 jylǵa jalǵa berý merzimimen 1 000 jer ýchaskesi anyqtaldy, olar bıyldan bastap kásipkerler arasynda bólinetin bolady, - dedi Álibı Jumaev.
Elordany damytý baǵdarlamasyn júzege asyrý kezeńinde tirshilikti qamtamasyz etý júıesi turaqtandyryldy, qoljetimdi turǵyn úı jáne áleýmettik sala nysandary salyndy, birqatar tabıǵat qorǵaý sharalardy iske asyryldy.
Osy ýaqyt ishinde qurylys kólemi 2 esege artty. 6,8 mln sharshy metr turǵyn úı paıdalanýǵa berildi, 275 shaqyrymǵa jýyq jol salynyp, qalpyna keltirildi. Bul jaqsy jaǵdaıdaǵy joldar sanyn 73%-ǵa deıin ulǵaıtýǵa múmkindik berdi, 2010 jyly bul kórsetkish 60%-dy quraǵan.
Sonymen qatar, qalanyń 42 qıylysynda ıntellektýaldy kólik júıesiniń jobasy engizildi, trafıkti basqarý ortalyǵymen jabdyqtalǵan. Osynyń esebinen elordanyń kólik qozǵalysy tyǵyz bolatyn alty kóshesinde ótkizý qabilettiligi 20%-ǵa ósti.
Qalanyń marshrýttyq jelisin jańǵyrtý avtobýs kestesin ońtaılandyrýǵa - kútý ýaqytyn azaıtýǵa jáne halyqty qamtý kórsetkishin ulǵaıtýǵa múmkindik berdi. Alty kóshede bus line arnaıy jolaqtary jasaldy, nátıjesinde avtobýstardyń jyldamdyǵy 15%-ǵa artty.
- Qalanyń elektr qýaty men jylý energııasy qajettiligin qamtamasyz etý maqsatynda qoldanystaǵy energııa kózderi JEO-1, JEO-2 jańǵyrtý jáne JEO-3 salý boıynsha jumystar júrgizildi. Qýattylyǵy 480 Gkal bolatyn energııa kózi JEO-3 birinshi kezeginiń qurylysy EKSPO-2017 kórmesin ótkizer kezde aıaqtalady, - dedi Álibı Jumaev.
«Nurly jol» baǵdarlamasy boıynsha salynyp jatqan nysandardy: jańa temir jol vokzalyn, EKSPO-2017 nysandaryn, Jasyl oramdy, sondaı-aq Turan dańǵylynyń boıynda salynyp jatqan nysandardy ortalyqtandyrylǵan jylýmen qamtýǵa qosý úshin qajetti 4-shi jáne 5-shi kezektegi jylý magıstraldarynyń qurylysy bastaldy.
Turǵyn úı-kommýnaldyq sharýashylyqty jańǵyrtý aıasynda kópqabatty 88 turǵyn úı kesheni jóndeldi. Osy kezeńde uzyndyǵy 18 km sýmen jabdyqtaý jáne uzyndyǵy 15 km káriz jelisi qaıta jóndeldi. Eske salaıyq, Taldykól aǵyndy sý jınaqtaǵyshyn joıý jobasy aıaqtalý satysynda.
