Elordanyń jeke tabysy 1 trln teńgeden asty – Jeńis Qasymbek

ASTANA. KAZINFORM – Astana qalasy ekonomıkasynyń negizgi draıveri - shaǵyn jáne orta bıznes, ol elorda ekonomıkasynyń 72,1%-n quraıdy.

- Áleýmettik-ekonomıkalyq kórsetkishter boıynsha oń dınamıka baıqalady. Qala ekonomıkasy ósýde. Jalpy óńirlik ónim birinshi jartyjyldyqtyń qorytyndysy boıynsha 7% qurady (5,4 trln teńge). Bıyl jalpy óńirlik ónim sektorynyń úlesi 13,9%-dan 15,7%-ǵa deıin ósýi baıqalady. Bul ónerkásip jáne qurylys salalarynyń belsendi damýynyń arqasynda bolyp otyr. Negizgi draıver shaǵyn jáne orta bıznes, ıaǵnı elorda ekonomıkasynyń 72,1%-n quraıdy. Bul respýblıka boıynsha eń joǵary kórsetkish, - dedi elorda ákimi Jeńis Qasymbek elordanyń áleýmettik-ekonomıkalyq damýy týraly esep bere turyp.

Ákimniń esebinshe, qalada 247 myńnan astam bıznes sýbektileri bar.

- Elordanyń jeke tabysy alǵash ret 1 trln teńgeden asty. Investıtsııa kólemi 1,6 trln teńgeden asyp, 20,4%-ǵa ulǵaıdy. Bul somanyń 70%–dan astamy jeke ınvestıtsııa esebinen. Elordanyń qurylys sektorynyń qarqyny 870 mlrd teńgeden asty. 11 aıdyń ishinde 3,6 mln sharshy metr turǵyn úı paıdalanýǵa berildi, bul ótken jylmen salystyrǵanda 6,4%-ǵa kóp. Jyl qorytyndysy boıynsha bul kórsetkish 4 mln sharshy metrge artyq, - deıdi ol.

Aıta keteıik, keshe habarlaǵanymyzdaı Astanada qurylysy uzaqqa sozylǵan kezekti eki turǵyn úı kesheni aıaqtaldy.