Elordanyń jasyl aımaǵyna qoıylatyn sanıtarlyq talaptar kúsheıtiledi
ASTANA. KAZINFORM — Astana irgesindegi jasyl beldeýdi saqtaý jáne qorǵaý maqsatynda sanıtarlyq talaptar qatańdaıdy. Bul týraly Astana qalasynyń qorshaǵan ortany qorǵaý jáne tabıǵatty paıdalaný basqarmasynyń basshysy Dáýlet Dosqulov málim etti.
— Sanıtarlyq qorǵaýǵa 4 jasyl aımaq alynady. Ol demalys aımaqtary, serýendeý aımaqtary, faýna aımaǵy, qaıta qalyptastyrý aımaǵy. Sanıtarlyq erejeler 7 taraý, 31 tarmaqtan turady, — dedi Dáýlet Dosqulov qalalyq máslıhattyń kezekten tys sessııasynda.
Onyń aıtýynsha, elorda turǵyndary men qonaqtary jasyl aımaqtarda emin-erkin qydyryp, demala alady, eń bastysy sanıtarlyq talaptardy saqtaý qajet.
— Sanıtarlyq qorǵaýǵa alynǵan jasyl aımaqtar aýmaǵynda mal jaıýǵa, qoqys jınaýǵa, jasyl aımaq aýmaǵyndaǵy ań-qustardy aýlaýǵa jáne basqa da landshaftqa zııany tıetin is-sharalar ótkizýge tyıym salynady. Talaptar buzylǵan jaǵdaıda ákimshilik jáne qylmystyq kodeks aıasynda jaýapkershilik qarastyrylǵan. Elorda irgesindegi jasyl aımaq qoldan jasalynǵanymen ol erekshe landshaft, ol qalany jel men shańnan qorǵaıdy, — dep tolyqtyrdy basqarma basshysy.
Spıker keltirgen málimetke súıensek, Astana irgesinde jasyl aımaqtyń kólemi 14,7 gektar, ol jerge 14,6 ártúrli kóshet otyrǵyzylǵan.
Aıta ketsek, jaqynda Astananyń jasyl beldeýine júzdegen qyrǵaýyl jiberildi.