Elorda tarıhynyń jylnamasyna aınalǵan qos basylymǵa 35 jyl toldy
ASTANA. KAZINFORM — Beıbitshilik jáne kelisim saraıynda «Elorda aqparat» medıaholdınginiń quramyndaǵy «Astana Aqshamy» jáne «Vechernıaıa Astana» gazetteriniń 35 jyldyq mereıtoıyna arnalǵan «Elorda shejiresi» atty saltanatty kontsert ótti.
Óner juldyzdarynyń kontserti bastalmas buryn Prezıdent ákimshiligi Memlekettik keńesshisi hatshylyǵynyń konsýltanty Qalqaman Sarın sóz alyp, Memlekettik keńesshi Erlan Qarınniń quttyqtaý hatyn oqyp berdi.
— Qurmetti «Astana aqshamy» jáne «Vechernıaıa Astana» gazetteriniń ujymy! Sizderdi qos basylymnyń 35 jyldyq mereıtoıymen shyn júrekten quttyqtaımyn. Ótken 35jyl — Táýelsizdik jyldarymen tuspa-tus kelgen Astananyń qalyptasýy men ósip-órkendeýiniń aınasyna aınalǵan kezeń. Osy jyldar ishinde gazetterdiń ár sanynda elordanyń tynys-tirshiligi, qoǵam ómirindegi mańyzdy oqıǵalar men eldik ister keńinen qamtylyp keledi. «Astana aqshamy» gazetinde jarııalanǵan el tarıhyndaǵy taǵdyrly sheshimderdiń jańǵyryǵy Táýelsizdik jylnamasyndaǵy aıshyqty oqıǵalar oıly oqyrmannyń júregine jol taýyp, ystyq yqylasyna bólendi. Al «Vechernıaıa Astana» gazeti óz oqyrmanyn sapaly ári shynaıy aqparatpen qamtamasyz etip, qala ómiriniń ózekti máselelerin kóterip, mazmundy da bedeldi basylymǵa aınaldy. Eki basylym da birneshe márte ulttyq jáne halyqaralyq deńgeıdegi marapattarǵa ıe bolyp, ózderiniń kásibı deńgeıin bıiktetip, jańa medıa keńistiginde laıyqty oryn aldy. Qazirgi tańda «Elorda aqparat» medıaholdıngi quramyna kiretin redaktsııalar elordanyń basty aqparat kózine aınalyp, qoǵamdyq pikir qalyptastyrýǵa yqpal etip otyr. Sizderdiń qalanyń damýy men eldiń órkendeýi jolyndaǵy shyǵarmashylyq eńbekterińizge tabys tileımin. Elordamen birge órkendep, halqymyzdyń senimdi aqparat kózi bolyp qala berýlerińizge tilektespin. Qalamdaryńyzdan qýat ketpesin, — delingen QR Memlekettik keńesshi Erlan Qarınniń quttyqtaý hatynda.
Al QR Prezıdenti baspasóz hatshysynyń orynbasary Erjan Baıtiles Prezıdent kómekshisi — baspasóz hatshysy Rýslan Jeldibaıdyń quttyqtaý hatyn oqydy.
Ol bul basylymdar elordamyzdyń tynys-tirshiligin, qalanyń ósip-órkendeý kezeńderin gazet betterinde keńinen dáriptep kele jatqanyn atap ótedi.
— Qos gazette jaryq kórgen kóptegen maqala Astana turǵyndarynyń muń-muqtajyna nazar aýdaryp, túıtkildi máselelerdiń sheshilýine oń yqpal etti. Basylymdardyń oqyrmany árdaıym kóp bolýyna tilektespin, — delingen quttyqtaý hatta.
Kontsertte Qaırat Baekenov, Qurmash Mahan, Ózgeris Sherikbaı, Marjan Arapbaeva, Aıgúl Qosan, Gúlsim Myrzabek, Rýhııa Baıdúkenova syndy óner maıtalmandary, sonymen qatar «Qorqyt» etno folklorlyq ansambli, «Jastar teatrynyń» artısteri, «Aınalaıyn» balalar hory óner kórsetti.