Elordanyń sol jaǵalaýynda eki jańa ýchaskelik polıtsııa pýnkti ashyldy
ASTANA. KAZINFORM – Elordada «Halyqqa jaqyn polıtsııa» qaǵıdatyn júzege asyrý jalǵasyp keledi. Búgin Astananyń Esil aýdanynda eki jańa ýchaskelik polıtsııa pýnkti jumysyn bastady.
Bul úshin halyq tyǵyz ornalasqan kósheler tańdap alyndy. Polıtseıler zamanaýı tehnıkamen tolyq jabdyqtalǵan jáne turǵyndar óz aýlasynan uzamaı-aq, ýchaskelik ınspektorlardan jedel kómek ala alady.
№29 ýchaskelik polıtsııa pýnkti «Jetisý» saıabaǵy aýmaǵynda, al №33 ÝPP – Buqar Jyraý kóshesindegi «Trıýmf Sıtı» turǵyn úı kesheninińde ashyldy.
Pýnktterdiń aýmaǵy 80,8 jáne 169,98 sharshy metr. Ár bólimshede qoǵamdyq tártipti saqtaý, turǵyndardyń ótinishterine jedel áreket etý jáne profılaktıkalyq jumystarmen aınalysatyn 9 qyzmetkerden jumys isteıdi.
− Esil aýdanynda turǵyndar ákimshilik buzaqylyqtar, otbasylyq janjaldar týraly kóp júginedi. Polıtsııa kúndelikti jumysynan bólek, demalysta túngi reıd júrgizip, qala kóshelerin patýrldeıdi. Oǵan qosa, Astanada halyqaralyq is-sharalar óte jıi uıymdastyrylady, sonda polıtseıler qaýipsizdik pen qoǵamdyq tártipti qamtamasyz etedi. Ázirge Esil aýdanynda 9 ýchaskelik pýnkt bar, jyl sońyna deıin taǵy ekeýin ashý josparlanǵan, - dedi Esil aýdandyq Polıtsııa basqarmasynyń bastyǵy Álibek Qojahmetov.
Esil aýdany ákimdiginiń málimetinshe, sońǵy bes jylda elordanyń sol jaǵalaýynda halyq sany 2,5 esege artqan.
− Árbir qalanyń josparynda óz normatıvteri bolady, halyq sany artqan saıyn olardyń qaýipsizdigin qamtamasyz etetin qansha polıtseı qajet ekeni de jazylady. Al búgin ashylǵan eki jańa pýnkt shamamen 80 myń halyqqa deıin qyzmet kórsete alady. Ásirese halyq kóp shoǵyrlanǵan Shubar móltekaýdanynda polıtsııa pýnkti múldem bolmaǵan edi. Jetisý saıabaǵyndaǵy ýchaskelik pýnkt osy mańaıdy tutas qamtı alady. Sonymen birge, Ekspo aýmaǵynda kóptegen jańa úıler salynyp jatyr, ol jaqqa da jańa polıtsııa pýnktteri qajet, - dedi Esil aýdanynyń ákimi Dármenııar Qydyrbekuly.
Aıta keteıik, bıyl Astanaǵa 1,7 mln týrıst keledi degen boljam bar.