Elordanyń «Óndiris» turǵyn úı alaby gazdandyrylady
ASTANA. KAZINFORM — Elordanyń «Óndiris» turǵyn úı alabyna gaz tartylady. Bul týraly qalalyq máslıhat sessııasynda elordanyń Energetıka basqarmasynyń basshysy Ádil Qynatov aıtty.
— Baıqońyr» aýdanynda ornalasqan «Óndiris» turǵyn alabyn gazdandyrý ózekti máselelerdiń biri bolyp otyr. Atalǵan turǵyn úı alabynda shamamen 40 myń adam turady. Sonymen qatar aýdan jeke turǵyn úılerdiń tyǵyz ornalasýymen sıpattalady.
Aıta keterligi, turǵyn úı alabynyń jeke sektorynda qys mezgilinde úılerdiń basym bóligi kómirmen jylytylady. Bul qorshaǵan ortaǵa keri áser etip, «Baıqońyr» aýdanynda jáne jalpy qala boıynsha atmosferaǵa shyǵarylatyn lastaýshy zattardyń kólemin arttyrady. Buǵan qosa, JEO-1, JEO-2 jáne JEO-3 kózderinde qoldanystaǵy ortalyqtandyrylǵan jylýmen jabdyqtaý júıesine qajetti bos qýattar joq. Osyǵan baılanysty turǵyn úı alabynyń qajettilikterin qamtamasyz etý, halyqty radıaldy jelilerge qajetti kólemde qosý múmkin emes.
Qalyptasqan jaǵdaıdy eskere otyryp, «Óndiris» turǵyn úı alabyn keshendi gazdandyrý — halyqty zamanaýı ári qoljetimdi jylý kózimen qamtamasyz etýge, sondaı-aq aýmaqty odan ári damytýǵa jaǵdaı jasaýǵa múmkindik beretin eń tıimdi sheshimderdiń biri, — dedi Ádil Qynatov.
Onyń aıtýynsha, ınvestıtsııalyq joba aıasynda 2 120 áleýetti abonentti qosýǵa múmkindik beretin gaz taratý ınfraqurylymyn qurý josparlanyp otyr.
Jobada jalpy uzyndyǵy shamamen 185 shaqyrym bolatyn gaz taratý jelilerin salý, gaz ótkizý qabiletin saǵatyna 20 myń tekshe metrge deıin jetkizý, turǵyn úı alabynyń shamamen 85 kóshesin gaz taratý ınfraqurylymymen qamtý jáne 2 120 abonentti tabıǵı gazǵa qosýǵa jaǵdaı jasaý kózdelgen.
Buǵan deıin Astanany gazdandyrý bıyl tolyq aıaqtalatynyn jazǵan edik.
