Elordanyń mektep oqýshylary bilim dodasynda 4 altyn medal jeńip aldy
ASTANA. KAZINFORM — Petropavl qalasynda jalpy bilim beretin pánder boıynsha 10-11(12) synyp oqýshylaryna arnalǵan qoǵamdyq-gýmanıtarlyq baǵytta respýblıkalyq olımpıada ótti. Bilim dodasynda elimizdiń ár óńirinen jınalǵan daryndy jastar shet tilderi boıynsha ózara baq synap, bilim men biliktilikterin joǵary deńgeıde kórsetti. Bul týraly elorda ákimdiginiń resmı saıty jazdy.
Astana qalasynan qatysqan 12 oqýshy úzdik nátıje kórsetip, qorjynǵa 4 altyn, 4 kúmis jáne 2 qola medal saldy. Bul – elordalyq bilim oshaqtarynyń sapaly daıarlyǵy men oqýshylardyń tabandylyǵynyń aıqyn dáleli.
Aǵylshyn tili páni boıynsha Daryndy qyz balalarǵa arnalǵan «Bilim-ınnovatsııa» lıtseı-ınternatynyń 11-synyp oqýshysy Aısha Árinhan ІІ oryn ıelense, «Canadian International School» mektebiniń 11-synyp oqýshysy Sardar Mamlın ІІІ orynǵa qol jetkizdi.
Frantsýz tili páninen elordalyq oqýshylar joǵary nátıje kórsetti. №17 mektep-gımnazııasynyń 11-synyp oqýshysy ıAsmın Shııabıden men №91 mektep-gımnazııasynyń 10-synyp oqýshysy Artem Kım І oryn ıegeri atandy. Al Ábish Kekilbaev atyndaǵy BINOM SCHOOL mektep-lıtseıiniń 11-synyp oqýshysy Baıansulý Baǵdat ІІ oryndy ıelense, №98 mektep-lıtseıiniń 10-synyp oqýshysy Tımýr Qaıyrbek ІІІ orynǵa turaqtady.
Nemis tili páni boıynsha da elordalyqtar kósh bastady. №46 mektep-gımnazııasynyń 10-synyp oqýshysy Evelına Safarova men 11-synyp oqýshysy Sofııa Tyl І oryn ıegeri atansa, osy bilim ordasynyń oqýshylary Ámir Mustafın men Ádilhan Ahmet ІІ orynǵa ıe boldy.
Joǵary nátıjelerdiń arqasynda Astana qalasynyń quramasy respýblıkalyq olımpıadanyń qorytyndy kezeńinde «Eń úzdik olımpıadalyq komanda – 2025» ataǵyn jeńip aldy. Bul jetistik – oqýshylardyń tynymsyz eńbegi men ustazdarynyń kásibı sheberliginiń jemisi.
