Elordanyń keıbir saýda jelisinde kartopty shektep satyp jatyr
ASTANA. KAZINFORM — Astanada «Small» jáne «Spar» saýda jelilerinde 5 keliden artyq kartop satyp alýǵa ýaqytsha shekteý qoıyldy.
Bul týraly qalalyq ınvestıtsııalar jáne kásipkerlikti damytý basqarmasy habarlaıdy.
— Elordada kartoptyń baǵasyn turaqtandyrý úshin barlyq qajetti sharalar qabyldandy. Kartop jetispeýshiligi baıqalmaıdy. Ónim qalanyń saýda jelileri men bazarlarda jetkilikti kólemde jáne qor ýaqtyly tolyqtyrylyp otyrady, — delingen habarlamada.
Degenmen elordanyń ınvestıtsııalar jáne kásipkerlikti damytý basqarmasy keıbir saýda jelisinde kartoptyń shekti kólemde satylyp jatqanyn rastady.
— Ónimdi jappaı satyp alýdy boldyrmaý jáne halyqty qamtý maqsatynda «Small» jáne «Spar» saýda jelilerinde kartopty satýǵa ýaqytsha shekteý engizildi, ıaǵnı bir adamǵa 5 keliden artyq satylmaıdy, — deıdi mekemeden.
Buǵan deıin Májilis depýtaty Aıdarbek Qojanazarov elde kartop baǵasynyń kúrt ósýin Úkimettiń byltyrǵy qatelikterimen baılanystyrǵan bolatyn.