Elordanyń qaı aýdandarynda jańbyr sýyna arnalǵan káriz júıeleri salynatyny belgili boldy
ASTANA. KAZINFORM — Astana qalasynyń kommýnaldyq sharýashylyǵy basqarmasy resmı saýalymyzǵa joldaǵan jaýabynda shahardaǵy nóser káriz júıesin jańǵyrtý jáne jańa kollektorlar salý jumystary jóninde málimdedi.
Vedomstvo bergen aqparatqa saı, sońǵy birneshe jylda salynǵan jáne jańǵyrtylǵan nóser káriz júıesiniń uzyndyǵy 22 shaqyrymnan asady.
– 2022–2025 jyldary nóserli káriz jelileri men qurylystaryna júrgizilgen monıtorıng barysynda shamamen 245 problemalyq ýchaske anyqtaldy. Búgingi tańda onyń 241 ýchaskesinde jumystar júrgizildi. Sý basýdyń aldyn alý maqsatynda qalǵan problemalyq ýchaskelerde nóserli káriz nysandaryn tazalaý, keńeıtý jáne salý boıynsha qysqa jáne orta merzimdi is-sharalar júzege asyrylyp keledi. 2019–2025 jyldary qalada nóserli, drenajdyq jáne aryq-lotok jelileriniń 22 shaqyrymnan astam magıstraldyq kollektorlary salynyp, qaıta jańǵyrtyldy, 9 sorǵy stantsııasy salyndy jáne 6 tazartý qurylysy qaıta jańǵyrtyldy. Nátıjesinde tazartý qurylystarynyń ótkizý qabileti 45%-ǵa artty, – delingen habarlamada.
Basqarma málimetinshe, elordada áli de 4 problemalyq ýchaske bar:
• Máńgilik El jáne Turan dańǵyldary, Qonaev, Dostyq jáne Saraıshyq kóshelerimen shektelgen aýmaq;
• Momyshuly dańǵyly, Sharl de Goll, Amman, Jalaıyrı kósheleri, Qoshqarbaev dańǵyly jáne Aınakól kóshesimen shektelgen aýmaq;
• Qaldaıaqov, Panfılov jáne Nájimedenov kóshelerimen shektelgen aýmaq;
• Sátbaev, Maılın, Munaıtpasov kósheleri jáne Táýelsizdik dańǵylymen shektelgen aýmaq.
Astana qalasynyń kommýnaldyq sharýashylyǵy basqarmasy olqylyqtardyń ornyn toltyrý maqsatynda atqarylyp jatqan jumystar jaıynda da málimet berdi.
– 2026 jyly 5 joba iske asyrylyp jatyr. Olar: III-3, III-4 jáne III-8 aýdandarynyń tazartý qurylystarynan Esil ózenine deıin sý burý kollektoryn salý; III-3 jáne III-4 aýdandarynyń tazartý qurylystaryn rekonstrýktsııalaý; I-4 jáne VI-1 aýdandaryndaǵy tazartý qurylystarynyń qurylysyn aıaqtaý, – delingen habarlamada.
Sonymen birge, vedomstvo bul jobalar belgilengen merzimderge sáıkes júzege asyrylyp jatqanyn atap ótti.
Aıta keteıik, buǵan deıin Astanadaǵy jańbyr sýy aǵatyn káriz júıelerin kútip ustaýǵa 1,7 mıllıard teńge jumsalatynyn jazǵanbyz.
