Elordanyń qaı aýdandarynda jań mektep salynady
ASTANA. KAZINFORM — Astanada oqýshy sanynyń ósýine baılanysty jańa mektepter salý jalǵasady. Aldaǵy jyldary bilim nysandary Nura jáne Esil aýdandarynda, sonyń ishinde jańa turǵyn úı alaptary men halyq kóp shoǵyrlanǵan aýmaqtarda boı kótermek. Olardyń qaı jerde ornalasatyny týraly Astana qalasynyń Bilim basqarmasy Kazinform tilshisiniń resmı saýalyna bergen jaýabynda málimdedi.
Basqarma dereginshe, Nura aýdanynda 2027 jyly jalpy qýaty 3 600 oryn bolatyn eki jańa mektepti paıdalanýǵa berý josparlanǵan. Olar «Alaý» jáne «Arkada» turǵyn úı alaptarynyń mańynda ornalasady.
— Budan bólek, Turan dańǵyly men Buqar jyraý kóshesi aýdanynda 4 000 oryndyq mektep salý josparda bar. «Respýblıka» turǵyn úı kesheniniń mańynda taǵy 2 400 oryndyq mektep salý kózdelip otyr, — delingen jaýapta.
Esil aýdanynda da birneshe jańa bilim nysany qarastyrylǵan.
— Qazir «Prıgorodnyı» turǵyn alabynda 4 000 oryndyq mekteptiń qurylysy júrip jatyr. Sonymen qatar Q. Qaısenov kóshesi men Uly Dala dańǵyly aýmaǵynda birqatar mektep salý jobasy josparlanǵan. Onymen qosa, jańa mektep salynatyn aýmaqtardyń qatarynda Qaratóbe jáne Orynbor kósheleriniń qıylysy, Zarechnyı turǵyn alaby, Úshkópir jáne Qaratóbe kósheleriniń mańy, sondaı-aq Saýran jáne AS-02 kósheleri aýdany bar, — delingen basqarma jaýabynda.
Alaıda Bilim basqarmasynyń jaýabynda bul mektepterdiń naqty qansha orynǵa esepteletini jáne qashan paıdalanýǵa beriletini kórsetilmegen.
Basqarma jańa mektepterdi iske qosý arqyly oqýshy oryndarynyń jetispeýshiligin birtindep azaıtyp, bala sany shamadan tys kóp mektepterge túsetin salmaqty tómendetýdi kózdep otyrǵanyn jetkizdi. Jańa bilim nysandary eń aldymen halyq sany jyldam ósip jatqan aýdandardaǵy qajettilikti óteýge baǵyttalǵan.
Aıta keteıik, buǵan deıin Astanada halyq sanynyń ósýine baılanysty jańa turǵyn aýdandar men áleýmettik nysandarǵa qajettilik artyp otyrǵany týraly jazǵan edik. Materıalda elordanyń aldaǵy jyldardaǵy damýy, qurylys qarqyndy júrip jatqan aýdandar jáne jańa bas josparda qarastyrylǵan ózgerister týraly aıtyldy.
