Elordanyń ınfraqurylymy joq shetkeri aýmaqtarynda turǵyn úıler salýǵa shekteý engiziledi
ASTANA. KAZINFORM — Elordanyń ınfraqurylymy joq shetkeri aýmaqtarynda kóppáterli turǵyn úıler salýǵa 2035 jylǵa deıin ýaqytsha shekteý engiziledi. Bul týraly búgin Astana qalalyq máslıhatynyń kezekten tys sessııasynda málim boldy.
Atalǵan másele boıynsha baıandama jasaǵan Astana qalasynyń Sáýlet, qala qurylysy jáne jer qatynastary basqarmasynyń basshysy Altynbek Ahmetovtiń aıtýynsha, Premer-mınıstrdiń birinshi orynbasarynyń 2025 jylǵy 10 qarashadaǵy hattamalyq tapsyrmasyn oryndaý maqsatynda elordanyń sáýlettik kelbetin qalyptastyrý jáne qala qurylysyn josparlaý qaǵıdalaryna tıisti ózgertýler engizildi.
— Qaǵıdalardy qalanyń shetkeri aýmaqtarynda Bas jospar jobasymen magıstraldyq-ınjenerlik jelilermen jáne áleýmettik ınfraqurylymmen qamtamasyz etilmegen jerlerde jer ýchaskesin berýge jáne kóppáterli turǵyn úıler salýǵa 2035 jylǵa deıin ýaqytsha shekteý engizý kózdeıtin tarmaqpen tolyqtyrý usynylady. Qazirgi ýaqytta qaǵıdalar jobasy ýákiletti organdarmen kelisildi. Atalǵan joba qoldanystaǵy zańnamalarǵa qaıshy kelmeıdi jáne quqyqtyq aktilerge qoıylatyn talaptarǵa saı. Jobany qabyldaý qarjylyq shyǵyndardy talap etpeıdi. Jeke kásipkerlik sýbektileri úshin qosymsha ákimshilik kedergiler týdyrmaıdy, — dedi ol.
Basqarma basshysy elordanyń ákimshilik aýdandyq alańdary ózgeretindigin de málim etti. Onyń aıtýynsha, endi Almaty aýdany — 8 412, Esil aýdany — 20 518, Nura aýdany — 18 516, Saraıshyq aýdany 6 953 gektar bolady. Sondaı-aq, Baıqońyr aýdanynyń shekarasy — 18 190, al Saryarqa aýdanynyń shekarasy 7 144 gektar bolyp bekitiledi.
