Elordada Esil jaǵalaýyndaǵy «alyp saǵat» buzylady

ASTANA. KAZINFORM — Elordada jumys istemeı turǵan «alyp saǵat» sýburqaǵy bıyl buzylady. Bul týraly Astana qalasynyń ákimi Jeńis Qasymbek aıtty.

«Ol buzylady. Ony qaıta qalpyna keltirý óte qymbatqa túsedi ári ózi óte kúrdeli qurylym. Sondyqtan ony osy jyldyń ishinde buzamyz dep sheshim qabyldadyq», — dedi Jeńis Qasymbek Úkimet otyrysynan keıingi brıfıngte BAQ ókilderiniń saýalyna oraı.

Sonymen qatar ol sýburqaqty buzý jumystaryna qansha qarajat ketetindigine qatysty esep qolynda joq ekenin, jalpy ony ornatýǵa bıýdjetten qansha aqsha jumsalǵanyn aıta almaıtynyn atap ótti. 

«Degenmen qalasańyzdar mundaı aqparatty usynamyz. Onyń esh qupııasy joq», — dedi elorda ákimi.

Esterińizge sala ketsek, elordanyń Esil jaǵasynda ornalasqan «alyp saǵat» sýburqaǵy 2016 jyly salynǵan. 

2019 jyldan bastap qazirgi ýaqytqa deıin sýburqaq energııamen jabdyqtaý kabelderi men basqa da shyǵyn materıaldaryn urlaý sebebinen jumys istemeı tur.

Atalǵan fakti boıynsha Esil aýdanynyń polıtsııa basqarmasy qylmystyq is qozǵaǵan.

Urylar áli tabylmaı jatyr.