Elordanyń Esil aýdanynda bir jerge bes ret zańsyz qoqys tastaý faktisi tirkelgen

ASTANA. KAZINFORM — Elordada «Jańa adamdar» qozǵalysynyń ókilderi zańsyz tastalyp jatqan qoqys máselesin kóterip, dabyl qaqty. 

— Jańa adamdar Astanada (Esil aýdany) Uly dala dańǵylyndaǵy «Aıva» turǵyn úı kesheni mańynda zańsyz qurylys jáne turmystyq qaldyqtar tastalatyn qoqys alańyn anyqtady. Kún saıyn ondaǵan júk kóligi qoqys tógip, aýdannyń ekologııasy men turǵyndarynyń densaýlyǵyna úlken qaýip tóndirip jatyr. Bastapqyda bıznes-ortalyq salýǵa arnalǵan bul aýmaq is júzinde qoqys alańyna aınalǵan. Sarapshylar bul qoqys tógýdiń zańsyz ekenin jáne qorshaǵan ortaǵa orny tolmas zııan keltirýi múmkin ekenin rastap otyr, — delingen habarlamada.

Qozǵalys belsendileri jaýapty tulǵalar men qoqys alańyndaǵy jumysshylardan máseleniń mán-jaıyn bilýge tyrysqan, biraq odan nátıje shyqpaǵan. Sondaı-aq, ol jerge basqa da qurylys nysandarynan qoqys jetkiziletini anyqtaldy.

Osy oraıda istiń mán-jaıyn jergilikti atqarýshy organ, ıaǵnı Esil aýdandyq ákimdiginen bilýge turystyq. Aýdan ákimdiginiń málimetinshe, qoqys zańsyz tastalǵan.

— Jyl basynan beri kórsetilgen ýchaskede 5 quqyq buzý fakti anyqtaldy. Jalpy, ótken jyly aýdan boıynsha 49 jeke jáne 15 zańdy tulǵa ákimshilik jaýapkershilikke tartyldy. Aýa raıynyń qolaıly maýsymy bastalysymen, ıaǵnı 25 naýryzdan bastap Esil aýdanynyń aýmaǵynda osyndaı qoqys úıindilerin tazalaý jumystary belsendi túrde júrip jatyr, — dedi Esil aýdandyq ákiminiń keńesshisi Quralaı Slıambekova.

Osylaısha 25 naýryzdan beri aýdan aýmaǵynan 700 tonnadan astam qoqys shyǵaryldy.

— Esil aýdanynyń ákimdigi turǵyndarǵa beıjaı qaramaı, belsendi azamattyq ustanym tanytqandary úshin alǵys bildiredi. Qala tazalyǵy — barshaǵa ortaq jaýapkershilik, — deıdi ol.

Birneshe kún buryn elordadaǵy qoqys shyǵaratyn kompanııalardyń jumysyna baqylaý qalaı júrgiziletini týraly jazǵan edik. 

Aıta ketsek, ótken jyly respýblıkalyq joldardan 700 myń tonna qoqys jınaldy.