Elordanyń densaýlyq saqtaý basqarmasy qyzylshaǵa baılanysty málimdeme jasady

Elordada qyzylsha aýrýy dendep barady. №3 kópbeıindi qalalyq balalar aýrýhanasynyń ınfektsııalyq statsıonarynda 200-ge jýyq bala qyzylshadan em alyp jatyr, onyń basym bóligi – ýaqytyly ekpe almaǵandar, dep habarlaıdy Kazinform elorda ákimdiginiń resmı saıtyna silteme jasap.

Aýrýhada jatqan analar arasynda ekpe alýdyń mańyzdylyǵyn túsingender kóp. Balalaryna ýaqytyly ekpe saldyrmaǵan analar men der kezinde vaktsına jasatqan analar oılarymen bólisti. 

«Balamnyń 5 kún boıy qyzýy kóterildi. Densaýlyǵy jaqsarmaı jatqanyn kórip, jedel medıtsınalyq járdem shaqyrdyq. Balam sóıleı almaı, tura almaı qatty aýyrǵan edi. Eger de ekpe alsam, bul jaǵdaı bolmaýshy ma edi dep oılaımyn. Vaktsına saldyrǵan úlken balam jeńil túrde aýyryp, tez saýyǵyp shyqty. Endi aldaǵy ýaqytta qyzylsha aýrýynan ekpeni aldyn ala mindetti túrde alamyn», – dedi Darıǵa Óteshova.

Qazirgi tańda, Qoǵamdyq densaýlyq saqtaý basqarmasymen qyzylsha aýrýynyń aldyn alý, emdeý jáne ımmýndaý boıynsha tıisti jumys júrgizilip jatyr. 

Jalpy, qabyldaý bólmesinde dárigerlerdi qabyldaýdyń 8 beketi, onyń ishinde qyzylsha boıynsha qabyldaý bólmesinde 2 beket uıymdastyryldy. Táýekel tobyndaǵy balalarǵa (Triage – júıesi boıynsha qyzyl tús) kezekten tys qyzmet kórsetiledi. Sondaı-aq árbir ınfektsııalyq bólimshede qosymsha orta medıtsınalyq personaldyń taǵy bir beketi ornalastyryldy. 

Eske salaıyq, elordada 6 aıdan bastap, 10 aı 29 kúnge deıingi sábılerdi jappaı vaktsınatsııalaý júrip jatyr. Olarǵa jeltoqsan aıynan bastap, 2-4 jas aralyǵyndaǵy balalar qosylady. 

«Naýqaspen baılanys bolǵan jaǵdaıda, qosymsha ekpe alý úshin kez kelgen turǵyn turǵylyqty mekenjaıy boıynsha emhanaǵa júginýi kerek ekenin eske salamyz. Ózińizdi jáne jaqyndaryńyzdyń densaýlyǵyn saqtańyz!», – delingen Qoǵamdyq densaýlyq saqtaý basqarmasy taratqan habarlamada.