Elordanyń bas jospary aıasynda qansha turǵyn úı salynady

ASTANA. KAZINFORM – Astana qalasynyń 2035 jylǵa deıingi bas jospary aıasynda birneshe memlekettik turǵyn úı salynady. Bul týraly «Astana bas jospary» ǵylymı-zertteý jobalaý ınstıtýtynyń bas dırektory Rýslan Jaqypov málim etti. 

«Bas josparda 43 memlekettik turǵyn úı, 20 jataqhana, 11 jalǵa beriletin turǵyn úı jáne 12 memlekettik kredıttik turǵyn úı salý kózdelgen. Onyń ishinde 18 turǵyn úı obektisin 2025 jyly salý kózdelip otyr», - dedi Rýslan Jaqypov elorda máslıhaty janyndaǵy qoǵamdyq keńes otyrysynda.

Odan ári Astana bas jospary mekemesiniń basshysy jańa órt depolary salynatynyn aıtty. 

«2030 jylǵa deıin 19 órt deposyn salý josparlanyp otyr. Onyń ishinde 3 obekti qurylysy aıaqtalýǵa jaqyn, olar Úrker, Óndiris jáne Kóktalda ornalasqan. Sonymen qatar 2030 jylǵa deıin 5 órt sóndirý bólimi qaıta jóndeýden ótedi jáne bir órt sóndirý stansasy men oqý-jattyǵý ortalyǵy salynady», - deıdi ol. 

Aıta keteıik, búgin Astana bas jospary mekemesiniń qabyrǵasynda qoǵamdyq keńes otyrysy ótti. Ol jerde elordanyń 2035 jylǵa deıin bas josparyn iske asyrý barysy talqylandy. Jobanyń maqsaty – jınaqy ári tıimdi qala qurý. 

Buǵan deıin 2025 jyly Astanada káriz sýyn tazalaıtyn júıe qurylysy salynatynyn habarlaǵan edik. 

Eske sala ketsek, Astana qalasynyń 2035 jylǵa deıingi bas jospary byltyr qarashada talqylaýǵa shyǵaryldy. 

Jospar keleshektegi keshendi damýdy, aýmaqty josparly uıymdastyrýdy, áleýmettik jáne ınjenerlik-kólik ınfraqurylym júıesi baǵyttaryn aıqyndaıtyn negizgi qujat.