Elordanyń bas ımamyna qatysty vıdeo taratqan azamatqa 700 myń teńge aıyppul salyndy

ASTANA. KAZINFORM – Elorda turǵyny áleýmettik jelide záýlim úıdiń vıdeosyn jarııalap, ol Astana qalasynyń bas ımamyna tıesili degen aqparat taratqan, biraq ol rastalmaı shyqty.

Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq soty áleýmettik jelide jala japqany úshin B. esimdi azamatqa qatysty isti qarady.

B. esimdi azamat áleýmettik jelilerde záýlim úıdiń vıdeosyn jarııalap, onyń halyqtyń qaıyrymdylyqqa bergen qarajattaryna salynǵanyn jáne záýlim úı Astana qalasynyń bas ımamyna tıesili ekenin aıtqan. 

- Cotta B.-nyń ózge azamattyń ar-namysy men qadir-qasıetine jáne bedeline nuqsan keltiretin málimet taratqanyn anyqtady. Sot otyrysynda quqyq buzýshy kinásin tolyq moıyndap, úıdiń kimge tıesili ekenin, onyń qandaı qarajatqa salynǵany oǵan belgisiz ekenin túsindirdi. Sonymen qatar beınejazbany qaralym úshin jarııalaǵanyn aıtyp, ókinish bildirdi, - dep habarlaıdy elorda soty. 

Jábirlenýshi aıyptyny zań boıynsha jazalaýdy surady. Sondaı-aq quqyq buzýshylyq faktisi is materıaldarymen, ákimshilik quqyq buzýshylyq týraly hattamamen, beınejazbamen jáne jábirlenýshiniń aryzymen rastaldy.

- Sot qaýlysymen B. Ákimshilik quqyqbuzýshylyq týraly kodekstiń 73-3-babynyń 2-bóligi boıynsha ákimshilik quqyq buzýshylyq jasaǵany úshin kináli dep tanylyp, oǵan 180 AEK (707 760 teńge) mólsherinde aıyppul salyndy, - delingen habarlamada. 

Sot qaýlysy zańdy kúshine engen joq. 

Aıta keteıik, atalǵan jaıtqa qatysty vıdeo áleýmettik jelide taraǵan edi.