Elordada workout-aımaǵy bar zamanaýı aýla ashyldy
ASTANA. KAZINFORM — Astananyń Almaty aýdanynda «Halyq qatysatyn bıýdjet» baǵdarlamasy aıasynda Ǵabıden Mustafın kóshesi, 5/1 mekenjaıynda ornalasqan úshinshi kúrdeli abattandyrylǵan aýla paıdalanýǵa berildi, dep habarlaıdy elorda ákimdiginiń resmı saıty.
2026 jylǵa arnalǵan «Halyq qatysatyn bıýdjet» baǵdarlamasynyń qorytyndysy boıynsha atalǵan mekenjaıda ornalasqan turǵyn úı turǵyndary «100+ páter» sanatynda 2-oryn ıelengen.
Sonyń nátıjesinde bıyl aýla aýmaǵynda keshendi abattandyrý jumysy júrgizildi.
Saltanatty is-sharaǵa Almaty aýdany ákiminiń orynbasary Maqsat Tasbolat, Astana qalasy máslıhatynyń depýtaty Azamat Ómirzaqov jáne aýdan turǵyndary qatysty.
Aýlada turǵyndardyń jaıly demalysyna arnalǵan ınfraqurylym tolyq jańartyldy. Atap aıtqanda, aýmaqqa jańa asfalt tóselip, kespetaspen jabdyqtalǵan trotýarlar salyndy. Sondaı-aq bordıýrler men palısadtar jańartylyp, balalar alańyna zamanaýı oıyn keshenderi men shaǵyn sáýlettik nysandar ornatyldy. Alańǵa tartan jabyny tóselip, kógaldandyrý jumysy júrgizilgen.
Budan bólek, aýlada workout elementteri bar zamanaýı sporttyq-jattyǵý aımaǵy jabdyqtalyp, oryndyqtar men qoqys jáshikteri ornatyldy.
Іs-sharada alǵashqy bolyp sóz alǵan Almaty aýdany ákiminiń orynbasary Maqsat Tasbolat turǵyndardy aýlanyń jańartylýymen quttyqtady.
— Qurmetti turǵyndar! Igilikterińizge berilip jatqan jańartylǵan aýlada balalaryńyz asyr salyp oınap, ósip-óne berińizder. Osy aýladan bolashaqta elimizdiń týyn bıikke kóteretin sportshylar shyqsyn. Sizderdi shyn júrekten quttyqtaımyn, — dedi Maqsat Tasbolat.
Óz kezeginde Astana qalasy máslıhatynyń depýtaty Azamat Ómirzaqov bastamashyl topqa alǵysyn bildirdi.
— Bul jaı ǵana aýmaq emes, bul — birinshi kezekte otbasy músheleri kórshilerdiń ortasynda tamasha keshterdi birge ótkizýge, balalardyń bos ýaqytyn qyzyqty ótkizýine arnalǵan birden-bir oryn. Aýlany jańǵyrtýǵa zor úles qosqan bastamashyl topqa, merdiger uıymǵa, aýdan ákimdigine alǵys bildiremiz, — dedi Azamat Ómirzaqov.
Aýdan ákimdiginiń málimetinshe, Almaty aýdanynda «Halyq qatysatyn bıýdjet» baǵdarlamasy aıasynda júzege asyrylyp jatqan barlyq aýla 1 maýsymǵa deıin aıaqtalyp, paıdalanýǵa beriledi.
Osyǵan deıin Astananyń ekinshi áýejaıy qaı aýdanda salynýy múmkin ekenin jazdyq.
