Elordanyń Almaty aýdanynda Balalardy qorǵaý kúnine oraı taǵy 7 aýla ashyldy
ASTANA. KAZINFORM – Elordada Almaty aýdanynyń aýmaǵynda bıyl 50 aýlany abattandyrý josparlanyp otyr. Sondaı-aq taǵy 100 aýlada jóndeý-qalpyna keltirý jumysyn júrgizý josparda bar.
Búgin «Halyq qatysatyn bıýdjet» baǵdarlamasy aıasynda myna mekenjaılar boıynsha 7 abattandyrylǵan aýla ashyldy: Maılın, 8, Kúıshi Dına, 44/1, Abylaı han, 25, Jumabaev, 12a jáne Músirepov, 6/1, 6/2 6/3.
Aýlalardyń ashylýy men Balalardy qorǵaý kúnine oraı óskeleń urpaqqa arnalǵan kontserttik baǵdarlama uıymdastyrylyp, anımatorlar shaqyryldy.
Bul aýmaqtarda shaǵyn sáýlet nysandaryn, balalar oıyn keshenderin ornatý, aldyńǵy baqtardy, oıyn alańdaryndaǵy jabyndardy aýystyrý, fýtbol jáne basketbol alańdaryn jóndeý, sondaı-aq jańa sport alańdary men turaq aımaqtaryn ashý sekildi aýqymdy jumystar júrgizildi. Sonymen qatar, qala turǵyndarynyń jaılylyǵy úshin oryndyqtar men qoqys jáshikteri ornatyldy.
Bul jobanyń ereksheligi qos átkenshek, teńgergish átkenshek, karýsel jáne t.b. sııaqty ulttyq stıl elementteri bar shaǵyn sáýlet nysandaryn ornatý boldy. Óz kezeginde bul qala ınfraqurylymyn damytýdaǵy biregeı qadam boldy jáne Almaty aýdanynyń turǵyndaryna arnalǵan demalys úshin jańa múmkindikter týǵyzdy.
«Turǵyndarǵa osy baǵdarlamaǵa belsendi qatysqandary úshin alǵys aıtamyz jáne bul abattandyrylǵan aýlalar búkil qoǵamymyzdyń jaıly oryndarynyń birine aınalady dep senemiz», - dep atap ótti Almaty aýdanynyń ákimdigi.
Aýla aýmaqtaryn abattandyrýmen qatar, 3 qoǵamdyq keńistikti abattandyrý jumysy da júrgizilip jatyr:
1. Táýelsizdik dańǵylynyń jaıaý júrginshiler bóligin damytý (Aqbulaq ózeniniń jaǵalaýynan B.Momyshuly dańǵylyna deıin) – jaıaý júrginshiler bóligin jaılastyrý, dańǵyldy kógaldandyrý jáne jaryqtandyrý jumystary júrgizilipi jatyr. Táýelsizdik dańǵyly boıynda múgedekter arbasyna tańylǵandar úshin kedergisiz orta qurylady. Jaıaý júrginshilerge qolaıly jaǵdaı jasaý úshin kóleńkeli shatyrlar jasaý da nazarǵa alynǵan.
2. T.Júrgenov kóshesin abattandyrý (Aınakól kóshesinen J.Nájimedenov kóshesine deıin) – jaıaý júrginshilerge arnalǵan demalys aımaqtaryn jaılastyra otyryp, jaıaý júrginshiler bóligin jóndep, abattandyrý jáne kóshelerdi jaryqtandyrý jumystary júrgizilýde. 6 myńnan astam aǵash jáne 44 myń buta otyrǵyzý josparlanyp otyr.
3. Aqbulaq ózeniniń jaǵalaýyn abattandyrý (Abylaı han dańǵylynan Amman kóshesine deıin) – qoǵamdyq keńistikti abattandyrý jumystary júrgizilýde, jumystar aýmaqty jaryqtandyrý men kógaldandyrýdy qamtıdy.
Bıyl Astanada barlyǵy 170 aýla men qoǵamdyq keńistik abattandyrylady. Jumys qalanyń barlyq aýdanyn, onyń ishinde turǵyn úılerdi qamtıdy. Jumystyń bir bóligi qazirdiń ózinde aıaqtaldy.
