Elordanyń Almaty aýdanynda 15 qoǵamdyq keńistik salynyp jatyr

ASTANA. KAZINFORM – Astana qalasynyń Almaty aýdanynda birneshe saıabaq ashylady. Bul týraly aýdan ákimi Rústem Táýekelov málim etti. 

– Bıyl 15 qoǵamdyq keńistik salý josparlanǵan, búginde 6 kishi saıabaq boıynsha jumys aıaqtaldy. Atap aıtqanda «Ońtústik-Shyǵys» shaǵyn-aýdanyndaǵy Keles kóshesi, «Jeleznodorojnyı» turǵyn alabyndaǵy Keregetas kóshesi, «3 Gektar» turǵyn úı kesheniń janynda jáne «Habar» turǵyn úı kesheniniń qarsy betindegi keńistik. Al Ǵ. Músirepov kóshesindegi qoǵamdyq keńistiktegi jumystar osy aptada aıaqtalady, - dedi Rústem Táýekelov aýdan halqymen kezdesý barysynda.

Sonymen qatar aýdan ákiminiń málimdeýinshe, B. Momyshuly dańǵyly men Q. Sátpaev kóshesiniń qıylysyndaǵy jer ýchaskesin qaıtaryp alý týraly talap-aryz berildi. 

– Ol jerde jyl sońyna deıin aýdan turǵyndary úshin taǵy bir qoǵamdyq keńistik salý josparlanyp otyr. Odan bólek Qazaqstan fýtbol federatsııasynyń janynda Abylaı han dańǵyly boıynda «Kúıshiler» alleıasy, Esil ózeniniń jaǵalaýyndaǵy jáne M. Jumabaev dańǵylynda qoǵamdyq keńistiginde jóndeý jumystary júrip jatyr. Aldaǵy ýaqytta Qajymuqan kóshesinde de jumys bastalady. Oqýshylar saraıynyń aınalasyndaǵy jáne kishi saıabaqty abattandyrý osy aıdyń sońyna deıin aıaqtalady, - dep sendirdi aýdan basshysy. 

Aıta keteıik, búgin elorda ákimi Jeńis Qasymbek «Almaty» aýdany turǵyndarymen kezdesip, halyqty tolǵaǵan saýaldarǵa jaýap berip jatyr.