Elordanyń 2025 jylǵy bıýdjeti bekitildi: 925 mlrd teńge qaıda jumsalady

  ASTANA. KAZINFORM – Astana qalasynyń 2025 jylǵa arnalǵan bıýdjeti bekitildi.

Qalalyq máslıhattyń kezekti sessııasy elorda ákimi Jeńis Qasymbektiń qatysýymen ótti. Aldaǵy jyldyń bıýdjetin qalalyq Ekonomıka jáne bıýdjettik josparlaý basqarma basshysynyń mindetin atqarýshy Aıjan Túgelbaeva tanystyrdy.

2025 jyly elordanyń bıýdjeti 925 mlrd teńgeni quraıdy, onyń ishinde ákimdik kóshelerdi jaryqtandyrýǵa, tazalaýǵa, kógaldandyrýǵa jáne zırattardy kútip ustaýǵa 107,5 mlrd teńge jumsaýǵa sheshim qabyldady. Odan bólek, qorshaǵan ortany qorǵaýǵa baǵyttalǵan jumystarǵa 22,4 mlrd teńge jumsamaq.

Kommýnaldyq sharýashylyqqa bir jylǵa 20,9 mlrd teńge bólinedi. Ol aqshaǵa bılik «Astana Tazalyq» JShS úshin 26 arnaıy tehnıka satyp alyp, uzyndyǵy 700 km jańbyr sýynyń kárizine qyzmet kórsetip, jańa jańbyr sýynyń jelileri men sýmen jabdyqtaý jáne sý burý júıelerin salýy tıis. Aıta keteıik, ótken jyly kommýnaldyq qajettilikke nebári 5,8 mlrd teńge bólindi.

Energetıkaǵa 21,5 mlrd teńge jumsalady. Bul soma energııa óndirýshi kompanııalardyń shyǵyndaryn sýbsıdııalaýdy, jylý-energetıkalyq jáne gaz tasymaldaý júıelerin salýdy jabýǵa tıis. Sonymen qatar, 5 200 abonentti gazben qamtýdy josparlap otyr jáne jylý energııasyn óndirýdiń 350 Gkal-ǵa arttyrýdy kózdep otyr.

Elordada qurylys salýǵa 2025 jyly 57,1 mlrd teńge jumsalady, bul bir jyl burynǵyǵa qaraǵanda 23 mlrd teńgege artyq. Kóbine turǵyn úı, áleýmettik jáne memlekettik nysandar salynady. Bılik 44,4 myń sharshy metr turǵyn úı men 6 mektepti paıdalanýǵa berýge, jumys isteıtin jastarǵa 1050 jalǵa beriletin páter berýge ýáde etip otyr.

Aldaǵy jyly kólik ınfraqurylymyn damytýǵa 76,1 mlrd teńge bólindi. Bul qarjy jolaýshylar tasymalyn sýbsıdııalaýǵa, jol qaýipsizdigin qamtamasyz etýge, jol tóseýge (13 km jol salynady jáne 8 km jóndeledi) jumsalmaq.

Kásipkerlikti qoldaýǵa aldaǵy jyly 15,6 mlrd teńge qarastyrylǵan.

Sáýlet jáne qala qurylysy salasyna 3,2 mlrd teńge bólinbek.

Kommýnaldyq múlikti basqarýǵa 4,5 mlrd teńge. 3 sporttyq jáne 1 mádenı obektini senimgerlik basqarý shyǵyndaryn óteıdi.

Turǵyn úı saıasatyna 27,9 mlrd teńge bólinedi. Qurylys salýǵa 19,2 gektar jer alynady, 333 turǵyn úı sertıfıkatyn berý josparlanyp otyr.

Polıtsııa departamentiniń qyzmetine 32,3 mlrd teńge, Tótenshe jaǵdaılar departamentine 3,5 mlrd teńge, tsıfrlandyrý salasyna 10,5 mlrd teńge qarastyrylǵan.

Qalalyq orta sapasyn baqylaý 0,7 mlrd teńge bólinedi, bul eńbekti qorǵaý, qurylys jáne jer qatynastary salasyndaǵy zańnamany baqylaýdy qamtamasyz etedi.

Elordanyń ishki saıasatyna 6,8 mlrd teńge kózdelip otyr. Atalǵan somaǵa 5 vedomstvolyq baǵynysty mekeme kiredi, olar memlekettik ishki saıasatty júrgizedi jáne jarııalaıdy.

Aıta keteıik, 4 jeltoqsanda Prezıdent «2025 – 2027 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna qol qoıdy.