Elordany tasqyn sý basý qaýpi joq — mınıstrlik

ASTANA. KAZINFORM — Sý resýrstary jáne ırrıgatsııa vıtse-mınıstri Nurlan Aldamjarov Astanadaǵy qorǵanys bógetin jóndeý jumystarynyń aıaqtalmaýyna baılanysty týyndaǵan alańdaýdy joqqa shyǵardy.

Eske sala ketsek, buǵan deıin AMANAT partııasynyń músheleri elordadaǵy qorǵanys bógetin qaıta qurýdyń uzaqqa sozylǵanyna nazar aýdarǵan bolatyn. Olardyń aıtýynsha, jumystyń ýaqtyly aıaqtalmaýynan qalany tasqyn sý basýy múmkin.

Osy jaǵdaıǵa túsinikteme bergen Sý resýrstary jáne ırrıgatsııa vıtse-mınıstri sý basý qaýpi joq ekenin aıtyp otyr.

— Astana turǵyndaryna eshqandaı qaýip joq, kóktemgi sý tasqyny kezeńi mınıstrliktiń turaqty baqylaýynda. Qazir kontrretteýshi boıynsha jumys júrgizilýde, ol tasqyn sýdy qabyldap, qala arqyly qaýipsiz ótkizýge daıyn. Sondyqtan eshqandaı alańdaýshylyqqa, kóshýge negiz joq, — dep sendirdi Nurlan Aldamjarov BAQ ókilderiniń saýalyna jaýap bere turyp.

Aıta keteıik, aqpannyń aıaǵynda Úkimet basshysynyń orynbasary Qanat Bozymbaev Astana mańyndaǵy aýyldyq jerlerdi sý tasqynynan qorǵaý sharalaryn teksergen edi.

Sonymen qatar vıtse-premer Qanat Bozymbaev Qaraǵandy oblysynyń sý tasqyny kezeńine daıyndyǵyn qarap shyqty.