Elordalyqtarǵa tegin medıtsınalyq tekserýden ótý usynylady
ASTANA. 10 naýryz. QazAqparat - Senbi, 12 naýryzda saǵat 10:00-den 16:00-ge deıin elordalyqtar «Ashyq esik kúni» aktsııasy aıasynda tegin medıtsınalyq tekserýden óte alady. Bul týraly Salaýatty ómir saltyn qurý ortalyǵynan habarlady.
Atalǵan is-sharanyń negizgi maqsaty - aýyryp em izdegenshe, aýyrmaıtyn jol izdeýge úndeý.
Atap aıtqanda, «Astanalyq» (burynǵy Artem) ámbebap bazarynda júrek qan tamyrlary aýrýlaryn emdeý boıynsha ashyq esik kúni ótedi. «Mega Astana» oıyn-saýyq ortalyǵynda №4 emhananyń dárigerleri glıýkometrııa apparatynyń kómegimen qant dıabeti máseleleri boıynsha, al №8 emhanada dárigerler glaýkoma boıynsha keńes beredi. Onkologııalyq dıspanser mamandary jatyr moıny jáne sút bezi obyryn erte anyqtaý týraly aqparat beredi. №1 jáne 2 perzenthanalar men perınataldyq ortalyqta balalardyń týa bitken jáne tuqymqýalaýshylyq estý kemistigin anyqtaý boıynsha ashyq esik kúni ótedi.
