Elordalyqtardyń ortasha ómir súrý uzaqtyǵy 74 jasty quraıdy
ASTANA. QazAqparat - Astana halqynyń ortasha ómir súrý uzaqtyǵy 74 jasty quraıdy. Qalalyq Densaýlyq saqtaý basqarmasynyń derekteri boıynsha, Astanada, jalpy Qazaqstanda medıtsınalyq-demografııalyq kórsetkishter jaqsaryp keledi, dep habarlaıdy elorda ákimdiginiń resmı saıty.
Jyl basynan beri elordada bala týý kórsetkishi 4%-ǵa ósip, 1000 adamǵa shaqqanda 29,78 qurady. Astana qalasynyń perınataldyq ortalyqtarynda táýligine ortasha eseppen 67-69 bala dúnıege keledi.
Ana men bala ólimin azaıtý boıynsha oń qarqyn baıqalady. Demografııalyq jaǵdaıdy jaqsartý, ana men sábı ólimin azaıtý úshin Astana qalasynyń pedıatrııa qyzmetiniń tujyrymdamasy ázirlendi. Neontologııa men pedıatrııadaǵy jańa baǵyttardy damytýǵa, mamandardy tálimgerlik pen sheberlik synyptary aıasynda úzdiksiz oqytýǵa, statsıonarlar men emhanalar arasyndaǵy ózara is-qımyldy jaqsartýǵa baǵyttalǵan jumystar júrgiziledi.
Medıtsınalyq qyzmetń deńgeıin jetildirý úshin dıagnoz qoıý men emdeýdiń ınnovatsııalyq tehnologııalary engizilýde. Qazirgi kezde elordada jedel mıokard ınfarktine qarsy kúres, ınsýlt ortalyǵy, gemodıalız, travmatologııa jáne ortopedııa ortalyǵy, balalarǵa, jas bosanǵan analarǵa ortodontıkalyq kómek kórsetý ortalyǵy, kardıoortalyq jumys isteıdi.
Qalalyq onkologııalyq ortalyq qaterli jańa túzilimderdi sáýlemen emdeýge arnalǵan jelilik jedeldetkishpen jabdyqtalǵan. Bul balalar men eresekterde túrli kólemdegi isikterdi meılinshe dál jáne dál sáýlelendirýge, isikti barynsha úlken dozamen sáýlelendirip, saý aǵza men tinderge múmkindiginshe az zııan keltirip, alyp tastaýǵa múmkindik beredi. Bul álemdegi qaterli isikti emdeýge arnalǵan eń zamanaýı apparat bolyp tabylady.
Jumysty durys uıymdastyrýda naýqastardy aýrýhanaǵa jatqyzý, esepke alý, dári-dármekpen qamtamasyz etý boıynsha avtomattandyrylǵan elektrondy júıeler tıimdi jumys isteıdi. Jyl saıyn qalanyń densaýlyq saqtaý klınıkalarynda 88 myńnan astam adam emdeledi, olardyń 24 myńnan astamy balalar.
Halyqtyń ómir súrý jasyn uzartý eń aldymen halyqtyń ólim-jitimin azaıtýmen baılanysty. Bul, óz kezeginde, júrek-qan tamyrlary júıesi, onkologııalyq aýrýlar, týberkýlez sııaqty t.b. aýrýlardy erte anyqtaýǵa baǵyttalǵan skrınıngtik baǵdarlamalar men is-sharalardy, naýqastardy dıspanserlerge jatqyzýdy, emdeý-aldyn alý sharalaryn ýaqytyly ótkizýdiń arqasynda múmkin bolyp otyr.
