Elordalyqtardy zańsyz mıtıngke shaqyrǵan azamat qamaýǵa alyndy

ASTANA. QazAqparat - Astana qalasynyń Іshki ister departamenti elorda turǵyndaryn zańsyz uıymdastyrylǵan aktsııalarǵa qatysqandar jaýapqa tartylatynyn eskertip, jeke bas múddesin oılaǵan arandatýshylardyń arbaýyna túspeýge shaqyrdy, dep habarlaıdy QazAqparat Elorda Info saıtyna silteme jasap.

Atap aıtqanda, elordalyq polıtseıler mamyr aıaǵynyń sońynda ereýilge shaqyrǵan azamatty anyqtady.

«2018 jylǵy 17 mamyrda áleýmettik jelilerge júrgizilgen monıtorıng kezinde Qaıyrly Omar esimdi azamattyń 21 mamyr kúni Astana ákimdigi ǵımaratynyń aldynda mıtıng uıymdastyrmaq bolǵany anyqtaldy. Oǵan ákimdiktiń ruqsat bermegenin eskersek, onyń áreketi QR Ákimshilik jaýapkershilik týraly kodekstiń 488-babyna sáıkes ákimshilik jaýapqa tartýǵa negiz bolady», - dep málimdedi ІІD baspasóz qyzmeti.

Osyǵa oraı 2018 jylǵy 18 mamyrda Astana ІІD jergilikti polıtsııa qyzmetiniń ýchaskelik ınspektory tarapynan Qaıyrly Omarǵa qatysty 488-bapqa sáıkes ákimshilik hattama toltyrylyp, ol Astana mamandandyrylǵan aýdanaralyq ákimshilik sotynyń qaýlysymen 7 táýlik merzimge qamaýǵa alyndy.

Astana qalasynyń ishki ister departamenti ruqsat etilmegen qoǵamdyq sharalarǵa qatysqandar ákimshilik jaýapqa tartylatynyn eskertti. QR ÁJK-niń 488-babyna sáıkes 20 AEK mólsherinde aıyppul salý nemese 10 táýlikke qamaýǵa alý qarastyrylǵan.