Elordalyqtardy tumaýǵa qarsy vaktsınalaý bastaldy
NUR-SULTAN. QazAqparat - 1 qazannan bastap elordada tumaýǵa qarsy ımmýnızatsııalaý naýqany bastaldy, dep habarlaıdy QazAqparat qala ákimdigine silteme jasap.
«Táýekel tobyna jatatyn azamattar tirkelgen jerindegi emhanada nemese jyljymaly brıgadalar arqyly tegin egiledi. Ákimdik Reseıde shyǵarylǵan «Grıppol plıýs» vaktsınasynyń 100 myń danasyn satyp aldy. Vaktsınany aqyly túrde saldyrǵysy keletin turǵyndar qalalyq emhanalar men jeke medıtsınalyq uıymdarǵa júgine alady. Olardyń tizimi Nur-Sultan qalasynyń Taýarlar men qyzmetterdiń sapasy men qaýipsizdigin baqylaý departamentiniń Facebook jelisindegi paraqshasynda kórsetilgen», - dedi ákimdikten.
Vaktsınatsııamen 7210 medıtsınalyq qyzmetker, 33789 bala (6 jastan asqan, dıspanserlik tirkeýde turǵan jáne jıi aýyratyn), jabyq mekemelerdegi 370 bala (balalar úıi, túzetý mektep-ınternaty, jetimder úıi, balalar qalashyǵy), medıtsınalyq-áleýmettik mekemeden 270 adam (qarttar úı), ekinshi nemes úshinshi kezeńdegi júktiligi bar 6000 áıel, sozylmaly aýrýmen tirkeýde turǵan 52 361 adam qamtylady.
«Vırýs jyl saıyn mýtatsııaǵa ushyraıtyndyqtan, bir ret aýyryp ómiriniń sońyna deıin ımmýnıtetke ıe bolýǵa bolmaıdy. Ótken jyly tumaýǵa qarsy alynǵan ımmýnıtet bıylǵy jyldyń vırýsynan qorǵaı almaıdy. Sondyqtan vaktsınany jyl saıyn alyp otyrǵan jón. Immýnıtet 14 kúnniń ishinde qalyptasyp, barlyq maýsym ishinde saqtalady (12 aı). Vaktsınany qazan jáne qarasha aılarynda alý usynylady», - dedi Nur-Sultan qalasynyń Taýarlar men qyzmetterdiń sapasy men qaýipsizdigin baqylaý departamentiniń basshysy Sádýaqas Baıǵabylov.
Aıta keteıik, tumaý vırýsy ınfektsııalanǵan adamnan túshkirý nemese jótel kezinde aýa arqyly taratylady. Sondaı-aq esik tutqasy, oıynshyqtar, lıft batyrmasy, qaǵaz aqsha, qol alysý kezinde berilýi múmkin.
