Elordalyqtar úıirme sapasyna kóńili tolmasa, qaıda habarlasýy kerek
Búgin elorda ákimdiginde balalar men jasóspirimderge arnalǵan shyǵarmashylyq úıirmeler jáne sport sektsııalary taqyrybynda onlaın formatta baspasóz máslıhaty ótti.
Brıfıngte «Tegin úıirmeler qanshalyqty sapaly uıymdastyrylyp jatyr? Úıirmelerdiń jumysyn kim qadaǵalaıdy? Ata-analardyń aıtýynsha, tegin úıirmeler tıisti deńgeıde ótpeıdi», - degen saýal qoıyldy.
Saýalǵa Nur-Sultan qalasy mádenıet basqarmasy mádenı-kórkem is-sharalardy uıymdastyrý bóliminiń basshysy Saltanat Mýksımova jaýap berdi.
«Biz óz betimizshe úıirmeniń qanshalyqty sapaly ótip jatqanyn teksere almaımyz. Quzyrly organ emespiz. Biraq, mádenıet basqarmasy men úıirmege jaýapty mekeme arasynda kelisimshart bar. Sol kelisimsharttyń aıasynda úıirme qalaı júrip jatqanyn qadaǵalaı alamyz. ıAǵnı ata-analar tarapynan úıirmeni ótkizý barysy men sapasyna qatysty ótinish-tilek nemese shaǵym bolsa, biz ol jaǵdaıdy anyqtap, teksere alamyz. Bizge habarlassa bolady», - dedi ol.
Sondaı-aq, basqarma ókili erekshe balalarǵa arnalǵan úıirme jumysy týraly aıtyp ótti.
«Buǵan deıin aıtqanymdaı, elordada 59 úıirme túri bar. Erekshe balalarǵa arnalǵan úıirme sonyń ishine kiredi, biz olardy bólip-ajyratpaımyz. Úsh sala bar. Inklıýzıvti, ınteraktıvti jáne arnaıy. Jalpy, úıirmege qatysýda shekteý joq», - deıdi S. Mýksımova.
Buǵan deıin elordada 15 myńǵa jýyq bala tegin shyǵarmashylyq úıirmelerge qatysyp júrgenin jazǵan bolatynbyz.
