Elordalyqtar tek Sinopharm vaktsınasyn ǵana saldyra alady

NUR-SULTAN. QazAqparat – Elordada Sinopharm vaktsınasynyń 214 myń dozasy bar. Nur-Sultan qalasy qoǵamdyq densaýlyq saqtaý basqarmasynyń basyshsy Tımýr Muratovtyń aıtýynsha, bul mólsher vaktsınalaý men revaktsınalaýǵa jatatyn kontıngentti tolyq qamtýǵa jetkilikti, dep habarlaıdy QazAqparat tilshisi.

«Qazirgi tańda vaktsınatsııa men revaktsınatsııaǵa bir ǵana vaktsına bar – qytaılyq óndirýshiniń Sinopharm vaktsıansy. Sany jetkilikti. Búgingi tańda 214 myń dozasy bar. Bul jetkilikti mólsher», - dedi basqarma basshysy.

Aıtýynsha, qala aýmaǵynda tolyq ujymdyq ımmýnıtetti qalyptastyrý úshin 600 myńnan astam adamdy vaktsınatsııalaý josparlanǵan bolatyn.

«Qala boıynsha emhanalarda 34 egý kabıneti jumys isteıdi. Revaktsınatsııaǵa keler bolsaq, 20 shildedegi málimet boıynsha 151 myńǵa jýyq adam bastapqy komponentti aldy, 6 myńnan astam adam tolyq revaktsınatsııadan ótti. Revaktsınatsııadan qaıta ótý kýrsyn 61 myńnan astam adam aldy.

Búgingi tańda bala emizetin jáne júkti áıel adamdar men jasóspirimder arasynda vaktsınatsııalaý aıtarlyqtaı jaqsarǵan. Atalmysh sanattaǵy 40 myńnan astam adam vaktsına aldy. Barlyǵy 2 myńnan astam júkti áıel, 31 myńdaı jasóspirim jáne 7 myńnan astam bala emizetin áıel tolyq ımmýndaýdan ótti. Endi shamamen 800 adam 2 komponentpen qamtylmaq. Osy baǵytta emhanalardyń jumysy odan ári jalǵasýda», - dedi Tımýr Muratov.

Sondaı-aq, ol elordadaǵy statsıonarlyq tósekterdiń 41%-y bos emes ekenin málim etti.

Onyń sózine qaraǵanda, Nur-Sultandaǵy epıdemıologııalyq ahýal «sary» aımaqqa jaqyndap keledi.