Elordalyqtar tegin zańgerlik keńes ala alady
Nur-Sultan qalasy ákimdiginiń resmı saıty habarlaǵanyndaı, ol úshin qosymsha arqyly tirkelip, mártebeni rastap, nóldik mólsherlememen tapsyrys berý qajet. Keıin Pro bono zańgerleri klıentpen baılanysady. «Biz «Qazaqstan zańgerler odaǵy» RQB jáne «Ulan-ǵaıyr dala eli» QB seriktesterimizben birge qazir tórt aımaqta (Aqmola, Qaraǵandy, Jambyl, Qyzylorda oblystary) kómek kórsetip jatyrmyz. Qazirge deıin 500-ge jýyq adam kómek aldy.
Ótinimder ártúrli saýaldarmen –járdemaqy, alıment, nesıe boıynsha túsedi. Sonymen qatar olar ótinishterdi jiberý, tutynýshylar quqyǵyn qorǵaý boıynsha anyqtamalyq suraqtar joldaıdy», – deıdi «Jas zańgerler palatasy» QB tóraǵasy Saǵıdolla Baımurat. Birlestik tóraǵasynyń aıtýynsha, qyzmet alýshylardyń zańgerler jumysyn baǵalaý múmkindigi de qarastyrylǵan.
«Jas zańgerler Palatasy» QB-nyń negizin qalaýshy 2015-2017 jylǵy «Bolashaq» baǵdarlamasy boıynsha London ekonomıka jáne saıası ǵylymdar mektebiniń túlegi. Onyń aıtýynsha, qyzmettiń jańa túri men qosymshasy – zań qyzmetteri naryǵyn, sapaly kadrlar men básekege qabilettilikti damytý úshin jasalǵan qadamdardyń biri. «Ótken jyly biz «Jas zańgerler palatasy» qoǵamdyq birlestigin qurdyq. Negizgi maqsat stýdent-zańgerlerge, taǵylymdamadan ótýshi jastarǵa tájirıbelik bilim berýdi, tájirıbeli zańgerlermen naryqta birge damýdy kózdeıdi. Adamdarǵa tegin keńes beriledi. Bolashaqta búkil Qazaqstan boıynsha qamtý josparlanýda. Biraq biz halyqtyń áleýmettik osal toptarynan bastadyq. Biz áleýmettik osal azamattarǵa kómek kórsetý ıdeıasyn Lawcenter qosymshasynda qoldandyq, bul áleýmettik jobalar sheńberindegi barlyq protsesterdi tsıfrlandyrýǵa múmkindik berdi», – deıdi Saǵıdolla. Buǵan deıin barlyq qyzmetter telefon, messendjerler men tegin zańgerlik kómek kabınetteri arqyly kórsetildi, alaıda pandemııaǵa baılanysty belsendilik tómendegeni baıqalady.
