Elordalyqtar senbilikke jappaı jumyldy
ASTANA. 21 sáýir. QazAqparat - Qala ákimi Imanǵalı Tasmaǵambetovtyń ózi bastap tańerteńnen qamdanǵan aýdan ákimdikteri, qalalyq departament, basqarma basshylary men qyzmetkerleri,
elorda turǵyndary aǵash otyrǵyzyp, aýlalardy qoqystan tazartyp, sanıtarlyq jáne kógaldandyrý jumystaryn júrgizdi, dep habarlady qalanyń resmı saıty.
«Kóktemde ótkiziletin senbilik kúzgi senbilikterge qaraǵanda óte mańyzdy. Óıtkeni kóktemde atqarylatyn sharýa óte kóp. Bıyl qardyń qalyń túsýine oraı, jumys ta eki eselendi. Biz birinshi kezekte Sanepıdqadaǵalaý departamentimen josparly jumys istep, qoqys kóp shoǵyrlanǵan jerlerdi tazartýdy negizge aldyq. Arnaıy senbilikke 300 tehnıka jumyldyryldy. Bir qýantatyny, turǵyndar mádenıeti joǵarylap, tazalyq saqtaýǵa daǵdylanyp keledi», deıdi Astana qalasy ákiminiń orynbasary Vasılıı Krylov.
Qala tazalyǵy árbir turǵyn úshin mańyzdy. Sondyqtan bas qalanyń kórkin kirgizýge úlken-kishi demeı halyq jappaı jumyldy. Naqty aıtsaq, bıyl senbilikke shamamen 80 000-ǵa jýyq adam qatysyp, 2500 aǵash otyrǵyzyldy. Bul jolǵy senbilikte aǵash-butaly kóshet túrleri otyrǵyzylyp, 1059 tekshe metr topyraq, 429 tekshe metr qum, 3,5 tonna áktas pen 5600 polıetılendi qap jumsaldy.
«Elbasy astanany kóshirerde jańa astanada saıabaq, gúlzarlar kóbeıedi degen edi. Mine, qalanyń gúldenýine biz de óz úlesimizdi qosyp jatyrmyz. Alǵashqyda oń jaǵalaýǵa aǵashtar otyrǵyzyp, kógaldandyrý jumystaryn júrgizsek, endi sol jaǵalaýdy kórkeıtýge atsalysyp jatyrmyz», deıdi Prezıdent Ákimshiligi jalpy bóliminiń meńgerýshisi Mirbolat Jaqypov.
Ekologııalyq aılyq aıasynda ótkizilgen sharaǵa Almaty aýdanynan 11 000-nan astam adam qatysqan. Sonyń ishinde 611 mekeme, 92 PIK. Tazalyq jumystaryn júzege asyrýda 41 júk kóligi, 20 júk tıeý tehnıkasy jumyldyrylyp, 320 tonnaǵa jýyq qoqys shyǵaryldy. Al, Esil aýdanyna qarasty Turan dańǵyly boıyna 1000 aǵash, Saryarqa aýdanyna qarasty Tilendıev dańǵylynyń boıyna 200 kóshet otyrǵyzylǵan.
Sondaı-aq, qalanyń 152 lastanǵan aımaǵy 509 tekshe metr qoqystan tazartyldy. Aıta ketý kerek, jalpyqalalyq senbilik barysynda oıyn, sport alańdary, aýlalar tazartylyp, shaǵyn sáýlet pishinderi men sýburqaqtarda jóndeý jumystary júrgizilýde.
