Elordalyqtar salyq organdaryna 2,1 mlrd teńge qaryz
Qazirgi ýaqytta elordalyq 69 287 turǵynnyń menshik salyǵy boıynsha 2,1 mlrd teńge bereshegi bar. Onyń ishinde kólik salyǵy boıynsha qaryz 1,5 mlrd teńgeni, múlik boıynsha 543 mln teńge jáne jer salyǵy boıynsha 86 mln teńgeni quraıdy.
Osy rette, Nur-Sultan qalasynyń Memlekettik kirister departamenti 9-13 jeltoqsan aralyǵynda «Jańa jylǵa qaryzsyz» jedel-aldyn alý sharasyn ótkizedi.
Onyń barysynda salyq tóleýden jaltaryp júrgen azamattar «Sergek» júıesi arqyly anyqtalyp, olarǵa bereshegin óteý týraly eskertý qaǵazy tapsyrylatyn bolady.
Elordalyq júrgizýshilerge salyqty sol jerde onlaın tóleýge múmkindik beriledi, keri jaǵdaıda olardyń kólikteri bereshek tolyq tólengenge deıin aıyp turaǵyna jetkiziledi.
Eske salaıyq, 2019 jyldyń 31 jeltoqsanyna deıin Qazaqstanda salyqtyq raqymshylyq júzege asyrylýda. Oǵan sáıkes, negizgi qaryz (2018 jylǵa eseptelgen múlik jáne jer salyqtaryn qospaǵanda) ótelgen jaǵdaıda, ósimpuldar alynyp tastalady. Búgingi kúnge deıin salyqtyq raqymshylyqty 40 myń adam paıdalandy. Olar 1,6 mlrd teńge somasyndaǵy negizgi salyq bereshegin tóledi, shegerilgen ósimpul somasy - 150 mln teńge.
Salyq tólemeıtin azamattardy anyqtaý maqsatynda elorda kóshelerine 11 patrýldik kólik jumyldyryldy.
