Elordalyqtar organıkalyq jáne óńdeletin qoqysty jeke-jeke konteınerge tastaıdy - Isekeshev
ASTANA. QazAqparat - Astana birinshi bolyp qoqysty jeke jınaý júıesine kóshpek. Turǵyndar organıkalyq qaldyq pen óńdeletin qoqysty eki túrli konteınerge tastaıdy. Bul týraly «Rýhanı jańǵyrý» baǵdarlamasyn júzege asyrý týraly OKQ-da ótken baspasóz máslıhatynda Astana qalasynyń ákimi Áset Isekeshev málim etti, dep habarlaıdy QazAqparat tilshisi.
«Ókinishke qaraı, bizde qoqysty dalaǵa laqtyratyn jaýapsyz adamdar bar. Meniń oıymsha, bul bizdiń mádenıettiń kórsetkishi sekildi. Biz qoqysty jınaý men óńdeý boıynsha úlken baǵdarlamany bastadyq. Alǵashqy satyda ınvestormen kelisip otyrmyz. Ol buǵan deıin toqtap turǵan zaýytty iske qosyp berdi. ıAǵnı, platıstıkti, aǵashty qaıta óńdeıtin tseh ashyldy. Investor 2 myń konteıner boıynsha 30 qoqys jınaýshyny satyp aldy. Qoqys boıynsha qazir asa úlken máseleni kórip otyrǵanymyz joq. Qoqystyń shyǵarylýyn baqylaýǵa aldyq», - deıdi ol.
Ákimniń aıtýynsha, atalǵan baǵdarlama boıynsha qazir ekinshi kezeń bastalǵan.
«Onyń basty maqsaty respýblıkada birinshi bolyp qoqysty jeke jınaý júıesine kóshý bolyp tabylady. Bul aıtalyq - jańa mádenıet. Eýropada árbir úı 4 qoqys shelegi turatynyn bilesizder. Dese de, qazir odan da bas tartyp jatyr. Al biz qoqysty ekige bólý arqyly basqa jolmen kettik: ıaǵnı qoqys organıkalyq qoqys jáne óńdeýge bolatyn - metall, aǵash, qaǵaz, plastık, kıim sekildi qoqystar dep bólip otyrmyz. Sondyqtan, 6 myń konteıner satyp alynyp, jýyq arada olardyń barlyǵy aýlalalarǵa ornatylady. Osy buqaralyq naýqandy mektepterde bastadyq. Turǵyndarǵa osyǵan mańyz berýdi surar edim. Sebebi, jaqynda qoqystardy bólý júıesine kóshemiz», - deıdi ol.
Áset Isekeshev qoqysty frantsýzdyq tehnologııamen bóle otyryp, qaıta óńdeıtin zaýyt ashylatyny atap ótti. Sonymen qatar, ol zaýyttyń qurylysy 2019 jyldyń kúzinde aıaqtalatynyna ýáde berdi.
«Astanada ekologııa máseleleri oılastyrylmaı, qoqys úıindileri jıylyp qalady. Polıtsııany jumyldyrsaq ta, bárin nazarǵa alý múmkin emes. Jyl saıyn qoqystar shyǵarylyp jatyr. Men Úkimetke qoqys shyǵarý salasyndaǵy kompanııalardyń jumysyna baqylaýdy kúsheıtý boıynsha usynys joldadym. «Atameken» palatasymen birge qoqys shyǵarýmen aınalysatyn kompanııalardy baqylaý boıynsha tıimdi mehanızmderdi qarastyrýdamyz», - deıdi Áset Isekeshev.
