Elordalyqtar mamyr merekelerin qalaı toılaıdy
1 mamyr - Qazaqstan halqynyń birligi kúnine oraı «Qazaq eli» monýmentiniń aldyndaǵy alańda túrli sharalar uıymdastyrylady. Elorda turǵyndary men qonaqtary «Yntymaǵy elimniń, Elbasynyń eńbegi!» mýzykalyq-horeografııalyq qoıylymyn tamashalaıdy. Ashyq alańda «Terra», «Naz», «Týǵan jer» horeografııalyq ujymdary, «Alashuly» toby, «Z» trıosy, sondaı-aq qazaqstandyq opera men estrada juldyzdary Súndet Baıǵojın, Medet Chotabaev, Zarına Altynbaeva, Marjan Arapbaeva jáne aǵaıyndy Júginisovter óz ónerin ortaǵa salady. Merekelik teatrlandyrylǵan qoıylym Nur-Sultan qalasynyń etno-mádenı birlestikteriniń shyǵarmashylyq ujymdarynyń kontsertimen jalǵasady. Sonymen qatar, jınalǵandar alańda uıymdastyrylatyn belbeý kúresi, arqan tartys, gir kóterý, asyq atý jáne qol kúresi syndy ulttyq sport túrlerinen kúsh synasady.
Budan basqa, árbir etno-mádenı birlestik óziniń ulttyq taǵamdaryn ázirlep, olardy jaıylǵan aq dastarqanǵa qoıyp, kópshilik nazaryna usynady. Osy maqsatta alańda galereıa túrinde shatyr konstrýktsııasy ornatylady. Merekelik dastarqannyń uzyndyǵy 50 metrdi quraıdy. Qazaqstan halqynyń birligi kúnine arnalǵan merekelik shara «Qazaq eli» alańynda saǵat 10:00-16:00 aralyǵynda ótedi.
Osy kúni saǵat 12:00-den 18:00-ge deıin ákimdik aldyndaǵy qalalyq alańda (Beıbitshilik k-si men Abaı dańǵylynyń buryshy) tanymal estrada ánshileriniń kontserti ótedi. Sahna tórinde Qanat Úmbetov, Ǵazızhan, Ernar Aıdar jáne taǵy basqalar óner kórsetedi. Merekelik kontsert júrgizýshileri - belgili shoýmender Azamat pen Anton jáne Dáýren Ámreev. Sondaı-aq, mereke qonaqtary asyq atý, arqan tartys, gir kóterý jáne qol kúresinen jarystarda básekege túsedi.
Sonymen qatar, 1 mamyrda saǵat 17:00-de EXPO Kongress ortalyǵynda kompozıtor Arman Dúısenovtiń «Arman dostyǵy» atty shyǵarmashylyq keshi ótedi. Kontsertke Roza Rymbaeva, Nurjamal Úsenbaeva syndy tanymal oryndaýshylar, «MýzART» toby, Tolqyn Zabırova, Jamılıa Serkebaeva, «Nur-Muqasan», Toqtar men Beıbit, Indıra Elemes, Marjan Arapbaeva, Aıgúl Qosanova, Erlan Rysqalı, Áıgerim Qalaýbaeva jáne shaqyrylǵan sheteldik artıster qatysady. Bıletter topticket.kz saıtynda onlaın jáne qalalyq kassalarda («Keruen city» SOSO, «Kerýen» SOSO, «Astana» kontsert zaly, «Jastar» saraıy) satylady. Bıletter quny - 2000-8000 tg.
Budan basqa, elordalyq teatrlarda, mýzeılerde jáne basqa da mádenı mekemelerde Qazaqstan halqynyń birligi kúnine oraılastyrylǵan taqyryptyq kórmeler, spektaklder, kontsertter men sporttyq jarystar uıymdastyrylady. Jalpy, Nur-Sultan qalasynda 20-dan asa shara ótkizý josparlanyp otyr. Sharalar kestesin Mádenıet jáne sport basqarmasynyń saıtynan bilýge bolady.
Al, 1 mamyr merekesinen keıin elordalyqtar 7 mamyr - Otan qorǵaýshy kúni men 9 mamyr - Jeńis kúni merekelerin toılaıdy.
7 mamyrda merekege oraı ákimdik aldyndaǵy Qalalyq alańda ashyq aspan astynda dıskoteka formatynda bes saǵattyq kontsert uıymdastyrylady. Mádına Sádýaqasova, Beıbit Qushqalıev, Ayree, «Zaman», «3038» toby, Raım men Artýr elordalyqtardy Otan qorǵaýshy kúnimen quttyqtaıdy. Kontsert saǵat 17:00-de bastalady jáne 22:00-de aıaqtalady.
Jeńis kúnin merekeleý aıasynda 8 mamyrda saǵat 10.00-de Ortalyq qalalyq zıratta Uly Otan soǵysynda alǵan jaraqattan kóz jumǵan jaýyngerlerdiń zıratyna Dańq gúl tizbegi jáne gúl sebetteri qoıylady.
Sonymen qatar, osy kúni «Astana» kontsert zalynda «Otan dep soqqan júregi...» kontserti ótedi, onda soǵys jyldaryndaǵy ánder oryndalady.
9 mamyrda saǵat 11:00-de «Otan qorǵaýshylar» monýmentine «Dańq gúl tizbegin» qoıý saltanaty ótedi. Al, «Stýdenttik» saıabaqta 11 áskerı palatka tigilip, soǵys ardagerleri men tyl eńbekkerleri úshin merekelik dastarqan jaıylady. Sondaı-aq, merekelik kontsert barysynda soǵys jyldaryndaǵy ánder oryndalady. Munymen qosa, «Jaýjúrek polk» sherýi ótedi. Sharaǵa qatysýshylar saǵat 12:30-da «Qazaq eli» monýmentiniń janynda jınalady, sherý Táýelsizdik dańǵylynan «Otan qorǵaýshylar» monýmentine deıin júrip ótedi.
Jeńis kúnine arnalǵan merekelik otshashý 9 mamyrda saǵat 23.00-de Esil ózeniniń jaǵalaýynda bolady.
