Elordalyqtar mamyr aıyndaǵy merekelerdi qalaı atap ótedi

Nur-Sultan qalasy ákimdiginiń aqparatyna sáıkes, 1 mamyr merkesine oraı «Qazaq eli» monýmentiniń aldyndaǵy alańda merekelik kontsert ótedi. Onda «Yntymaǵy elimniń, Elbasynyń eńbegi!» mýzykalyq-horeografııalyq qoıylymyn, «Terra», «Naz», «Týǵan jer» horeografııalyq ujymdarynyń, «Alashuly» tobynyń, «Z» trıosynyń, sondaı-aq qazaqstandyq opera jáne estrada juldyzdary Súndet Baıǵojınniń, Medet Chotabaevtyń, Zarına Altynbaevanyń, Marjan Arapbaeva jáne aǵaıyndy Júginisovterdiń ónerin tamashalaýǵa bolady. Merekelik teatrlandyrylǵan qoıylym Nur-Sultan qalasynyń etno-mádenı birlestikteriniń shyǵarmashylyq ujymdarynyń kontsertimen jalǵasady.

Sonymen qatar, jınalǵandar alańda uıymdastyrylatyn belbeý kúresi, arqan tartys, gir kóterý, asyq atý jáne qol kúresi syndy ulttyq sport túrlerinen kúsh synasa alady.

Budan basqa, árbir etno-mádenı birlestik óziniń ulttyq taǵamdaryn ázirlep, dám tatý úshin olardy kópshilikke usynady. Osy maqsatta alańda galereıa túrinde shatyr konstrýktsııasy ornatylady. Merekelik dastarqannyń uzyndyǵy 50 metrdi quraıdy.

Qazaqstan halqynyń birligi kúnine arnalǵan merekelik shara «Qazaq eli» alańynda saǵat 10:00 men 16:00 aralyǵynda ótedi.

Osy kúni saǵat 12:00-den 18:00-ge deıin ákimdik aldyndaǵy qalalyq alańda (Beıbitshilik kóshesi men Abaı dańǵylynyń buryshy) tanymal estrada ánshileriniń kontserti ótedi. Sahna tórinde Qanat Úmbetov, Gazızhan, Ernar Aıdar jáne ózge de juldyzdar óner kórsetedi. Merekelik kontsert júrgizýshileri - belgili shoýmender Azamat pen Anton, Dáýren Ámreev. Sondaı-aq, mereke qonaqtary asyq atý, arqan tartys, gir kóterý jáne qol kúresinen jarystarda básekege túsedi.

Budan bólek, 1 mamyrda saǵat 17:00-de EXPO Kongress ortalyǵynda kompozıtor Arman Dúısenovtyń «Arman dostyǵy» atty shyǵarmashylyq keshi ótedi. Kontsertke Roza Rymbaeva, Nurjamal Úsenbaeva, Tolqyn Zabırova, Jámılá Serkebaeva, Toqtar men Beıbit, Indıra Elemes, Marjan Arapbaeva, Aıgúl Qosanova, Erlan Rysqalı, Áıgerim Qalaýbaeva, «Nur-Muqasan», «MýzART» toptary jáne sheteldik artıster qatysady. Bıletter www.topticket.kz saıtynda onlaın jáne qalalyq kassalarda («Keruen city» SOSO, «Kerýen» SOSO, «Astana» kontsert zaly, «Jastar» saraıy) satylady. Baǵasy 2-8 myń teńge aralyǵynda.

Budan basqa, elordalyq teatrlarda, mýzeılerde jáne basqa da mádenı mekemelerde Qazaqstan halqynyń birligi kúnine oraılastyrylǵan taqyryptyq kórmeler, spektaklder, kontsertter men sporttyq jarystar uıymdastyrylady. Jalpy, Nur-Sultan qalasynda 20-dan asa shara ótkiziletini josparlanǵan. Sharalar kestesimen Mádenıet jáne sport basqarmasynyń saıtynan tanysýǵa bolady.

Al 7 mamyr merekesine oraı ákimdik aldyndaǵy qalalyq alańda dıskoteka formatynda bes saǵattyq kontsert uıymdastyrylady. Mádına Sádýaqasova, Beıbit Qushqalıev, Ayree, «Zaman», «3038» toby, Raım men Artýr elordalyqtardy Otan qorǵaýshy kúnimen quttyqtaıdy. Kontsert saǵat 17:00-de bastalyp, 22:00-de aıaqtalady.

Jeńis kúnin merekeleý aıasynda 8 mamyrda saǵat 10:00-de Ortalyq qalalyq zıratta Ekinshi dúnıejúzilik soǵysta qaza bolǵan jaýyngerlerdiń zıratyna Dańq gúl tizbegi jáne gúl sebetteri qoıylady. Sonymen qatar, osy kúni «Astana» kontsert zalynda «Otan dep soqqan júregi...» kontserti ótedi, onda soǵys jyldaryndaǵy ánder oryndalmaq.

9 mamyr kúni saǵat 11:00-de «Otan qorǵaýshylar» monýmentine «Dańq gúl tizbegin» qoıý saltanaty ótedi. Al «Stýdenttik» saıabaqta 11 áskerı palatka tigilip, soǵys ardagerleri men tyl eńbekkerleri úshin merekelik dastarqan jaıylady. Sondaı-aq, merekelik kontsert barysynda soǵys jyldaryndaǵy ánder shyrqalady.

Jeńis kúnine arnalǵan merekelik otshashý 9 mamyrda saǵat 23:00-de Esil ózeniniń jaǵalaýynda bolady.