Elordalyqtar qoqys jáshikteriniń túsin ózderi tańdaı alady
ASTANA. QazAqparat - Elordanyń Saryarqa aýdanynyń ákimdigi qala turǵyndaryna qoqys jáshikteriniń túsin tańdaýǵa qatysty saýalnama júrgizip jatyr, dep habarlaıdy QazAqparat tilshisi.
«Mamyr aıynda Qosshyǵululy 25 mekenjaıyna konteınerler alańynyń jańa dızaınyn jasap, ornatqan bolatynbyz. Onyń syrty aǵash túste qaptalyp, aqparattyq taqtaısha qoıylǵan. Onyń túsi men tıimdiligi boıynsha turǵyndardyń pikirlerin bilý maqsatynda testileýden ótkizdik. Jaqynda turǵyndardyń jaýaptaryn alyp, nátıjesinde «aǵash túsi» qalalyq formatqa kelmeıtinin, ashyq metaldyń kirsheń bolatynyn, jalpy aıada onyń aıqyn kórinip turatynyn jáne «qoqys jáshikteri» kózge baıqalmaıtyndaı bolý kerektigin bildik. Sonda da meniń jeke ózime osy nusqa unaıdy», - dep jazdy Saryarqa aýdanynyń ákimi Arman Turlybek óziniń Feısbýk paraqshasynda.
Arman Turlybek jaqyn ýaqytta aýlalarǵa qoıylatyn jáshikterdiń dızaınyn, onyń alańynyń túsin tańdaý, sondaı-aq anyqtama taqtaıshalaryna ne jazý kerektigin bilý úshin turǵyndarmen pikir almasqysy keletindigin atap ótti.
«Pikirlerge Sizge unaǵan tústiń nómirin belgileýińizdi nemese óz nusqańyzdy jazýyńyzdy suraımyz. Kóp daýys sanymen tańdalǵan nusqany daıyndaýǵa jiberemiz. Sonymen birge búgingi kúni biz dástúrli konteınerlik alańdardy aýdannyń 68 mekenjaıyna qosymsha qoıdyq. Kóktal 1, Agroqalashyqtaǵy alańdardy jóndeýdi aıaqtadyq. Endi Kóktal 2-ge 40 jańa alań ornatýǵa kirisemiz», - deıdi ol.
