Elordalyqtar ıesiz qalǵan ıt-mysyqtardy asyrap alýda
NUR-SULTAN. QazAqparat – Búgin elordada ıesiz qalǵan ıt pen mysyqtardyń jármeńkesi ótti, dep habarlaıdy QazAqparat tilshisi.
«Búgingi jármeńkeni ótkizýge sebep, jyl sanap bas qalamyzda qaraýsyz qalǵan ıt-mysyqtardyń sany kóbeıip keledi. Búginde qaladaǵy ıesiz qalǵan janýarlardy panalatý ortalyǵynda 700-den astam ıt pen mysyq bar. Degenmen ol ortalyqtyń shamadan tys janýarlardy qabyldaý múmkindigi joq. Negizi ereje boıynsha panalaý ortalyǵyna kelgen, ıt nemese mysyqty 60 kún kóleminde ustaýǵa ǵana ruqsat beriledi. Odan soń úshinshi tulǵaǵa berý qajet. Osy maqsatta búgingi jármeńkeni uıymdastyrýdamyz», - dedi Nur-Sultan qalasy Qalalyq orta sapasy jáne baqylaý basqarmasynyń baspasóz hatshysy Dana Turǵynova.
Onyń aıtýynsha, elorda turǵyndarynyń janýarlardy asyrap alýǵa degen qyzyǵýshylyqtary aıtarlyqtaı joǵary emes.
«Búgingi kórmege veterınarlyq tekserýden ótken, tazalanǵan ıt pen pysyqtar qoıyldy. ıAǵnı barlyǵy birdeı jetkizilgen joq. Dál qazirgi ýaqytta 8 mysyq jáne 3 ıt óz ıesin tapty. Eger kelýshilerden suranys bolyp jatyrsa, qosymsha ákeletin bolamyz. Jáne olardy jetkizý men jalpy osy sharany uıymdastyrýǵa 10-nan astam erikti belsendilik tanytýda», - dedi ol.
Sondaı-aq, basqarma ókili ıt pen mysyqtardy asyrap alýshylarmen kelisimshart jasalatynyn da aıtyp ótti.
«Janýarlardy alyp, onyń qyzyǵy basylǵan soń, dalaǵa jibere salatyn jaıttar da kezdesip jatyr. Ókinishke qaraı, ondaı adamdar bar. Sol úshin de biz árbir jeke asyrap alýshymen kelisimshart jasasýdamyz. Árıne ol azamattardy naqty bir nársege mindettemeıdi, maqsat – janýardy asyrap alǵannan keıingi jaýapkershilikti sezindirý. Jáne eger ol adam alǵan ıt pen mysyqty biz taýyp alsaq, ol kisige ekinshileı janýar berilmeıdi», - deıdi ol.
Basqarmanyń baspasóz hatshysynyń sózine sensek, panalaý ortalyǵyndaǵy janýarlardyń barlyǵy karantın men vaktsınatsııalaýdan ótip, veterenar mamannyń baqylaýynda.
