Elordalyqtar Ǵarıfolla Qurmanǵalıevti eske aldy - FOTO
ASTANA. QazAqparat - Astana jurtshylyǵy Qazaqstan Respýblıkasynyń halyq ártisi, Memlekettik syılyqtyń ıegeri, ánshi-kompozıtor Ǵarıfolla Qurmanǵalıevti eske aldy. Osy oraıda, Astana tórinde óner ıesiniń týǵanyna 105 jyl tolýyna arnalǵan «Ánimen elin terbegen» atty kontsert ótti.
Áýeli «Qazaq dalasynyń orfeıi» atty derekti fılm kórsetildi. Osy fılmde óz pikirin bildirgen Memleket jáne qoǵam qaıratkeri, jazýshy Ábish Kekilbaıuly Ǵarıfolla Qurmanǵalıevtiń án aıtýdaǵy asqan sheberligin, onyń óz ánderimen halyqtyń júregin jaýlap alǵanyn atap ótti. Halyq ony «Ǵarekeń» dep atady. Óner ıesi retinde ol halyqtyń shynaıy qurmeti men mahabbatyna bólendi.
Ǵarıfolla Qurmanǵalıev aqyn, sazger Muhıt Meráliulynyń ánderin halyqqa jetkizýshisi ári nasıhattaýshysy boldy. Dástúrli ánderdiń oryndaıdyń asqan sheberi bolǵany anyq. Ǵarekeńniń qazaq óneriniń saqtaýyna, órkendeýine qosqan úlesi ushan teńiz.
Ol tek ánshi ǵana emes, opera ártisi retinde de kóp eńbek sińirgen óner ıesi. 1934 jyldan 1966 jylǵa deıin opera sahnasynda óner kórsetip, E.Brýsılovskııdiń «Jalbyr», «Er Tarǵyn», «Aıman-Sholpan», «Qyz Jibek» operalaryndaǵy Jaras, Elemes, Sahan, Shege rólderin, Muqan Tólebaevtyń «Birjan-Sarasyndaǵy» Estaı, Ahmet Jubanovtyń Abaı» operasyndaǵy Narymbet beınelerin sahnada somdaǵan bolatyn. Sondaı-aq birqatar kórkem fılmderge túskeni de anyq.
Elorda turǵyndary aldynda Batys Qazaqstan oblysynyń tanymal ánshileri óner kórsetti.
Osy kontsertte Ǵ.Qurmanǵalıev atyndaǵy ánshiler baıqaýynyń laýreaty Danııar Eleýov Muhıttyń «Aınamkóz» ánin jáne Óteǵalıdyń «Óteǵalı» ánin shyrqady. Ámire Qashaýbaev atyndaǵy ánshiler baıqaýynyń laýreaty Serik Ábdirahmanov halyqtyń «Teke qala» áni men Ómir Kóshekbaıulynyń termesin oryndady. Al kelesi kezekte Respýblıkalyq baıqaýlardyń laýreaty Ernar Ómiráli kórermenderge Ǵ.Qurmanǵalıevtiń «Aqjaıyq», «Súıgen jar» ánderin tartý etti. Qalamqas Orasheva atyndaǵy jyrshylar baıqaýynyń laýreaty Laýra Muhamedjanova Muhıttyń «Úlken aıdaıy» men halyqtyń «Jelkildek» ánin oryndap berdi.
Odan keıin sahnaǵa shyqqan Armat Islamǵalıevtyń oryndaýyndaǵy Muhıttyń «Kishi aıdaı» áni men Sartaıdyń termesin kórermen qaýym ystyq yqylaspen qabyl aldy.
Osy óner keshinde Ǵarıfolla Qurmanǵalıevtiń shákirti, belgili ánshi, Qazaqstannyń eńbek sińirgen ártisi Sáýle Taýdaeva Muhıt pen halyq ánderin naqyshyna keltire shyrqady.
Qurmanǵazynyń «Aqbaı» kúıin jas dombyrashy Dosym Maqsotov oryndady.
Tanymal ánshi, aıtys aqyny, Qazaqstannyń eńbek sińirgen qaıratkeri Qatımolla Berdiǵalıev sahnaǵa shyqqanda, Elorda kórermenderiniń úlken qoshemetine bólendi. Ol Muhıttyń «Alýash», halyqtyń «Jyloı» ánderin, Birjan-Sara operasynan «Estaıdyń termesin oryndap, án súıer qaýymdy bir jelpintip tastady.
