Elordalyqtar emhanaǵa eGov arqyly tirkeledi
«Jyl saıyn 15 qyrkúıek men 15 qarasha aralyǵynda elorda turǵyndaryna bastapqy medıtsınalyq-sanıtarlyq kómek (BMSK) kórsetetin emdeý mekemelerine óz qalaýy boıynsha tirkelý múmkindigi beriledi. Bıyl bul naýqandyq shara barysynda ózgerister bar. Atap aıtqanda, turǵyndar endi tańdaǵan emdeý mekemelerine eGov elektrondy úkimet veb-portaly arqyly suranys jiberedi. Ol úshin elektrondyq-tsıfrlyq qoltańba (ETsQ) bolýy qajet.
Emhanaǵa tirkelý protsesin avtomattandyrýdyń arqasynda túrli tártip buzýshylyqtarǵa jol berilmeıdi. ıAǵnı, endi tirkelý týraly suranysty qoldan jasaý múmkin emes», delingen habarlamada.
Qordyń málimetinshe, osy oraıda mańyzdy bir máseleni eskergen jón. Emhana nemese dárigerlik ambýlatorııany erkin tańdaý prıntsıpi tek turǵylyqty jerdiń ákimshilik-aýmaqtyq birligimen ǵana shekteledi. Respýblıkalyq jáne oblystyq mańyzy bar qalalarda ol – patsıenttiń turatyn aýdany.
«Buryn ondaı shekteý bolǵan joq. Alaıda is júzinde ondaı erkindik birqatar qolaısyzdyqtar týyndatty. Máselen, turǵylyqty jeri boıynsha tirkelmegen adamdarǵa, onyń ishinde júkti jáne jańa týǵan nárestelerge qyzmet kórsetý jaǵynan qıyn boldy. Osy jaılardy eskere kele, normatıvtik bazaǵa ózgerister engizildi. Endi, BMSK-ny qaladaǵy bir aýdannyń aıasynda ǵana tańdaýǵa bolady» - deıdi «Áleýmettik medıtsınalyq saqtandyrý qory» KEAQ Nur-Sultan qalasy boıynsha fılıalynyń dırektory N.Qabdyqaparov.
Tirkeý kezinde ata-anasy da, balalary da bir emhanaǵa baratyndaı otbasylyq qyzmet kórsetý prıntsıpine basymdyq beriledi. 18 jasqa tolmaǵan balalardy olardyń zańdy ókilderi tirkeýge quqyly.
BMSK uıymynda tirkelgen adamdar shamadan tys kóp bolsa, Qoǵamdyq densaýlyq saqtaý basqarmasynyń buıryǵymen basqa emhanaǵa tirkemeı qoıýy da múmkin. Qoldanystaǵy normatıvter boıynsha, dáriger qabyldaýyna kelgen adamǵa jetkilikti kóńil bólinýi úshin, jalpy praktıka dárigeriniń ýchaskesinde 1 700 patsıentten artyq bolmaýy tıis. Osy rette, qor medıtsınalyq qyzmet kórsetý sapasyn jaqsartý maqsatynda júıeli jumys júrgizýde. Medıtsınalyq saqtandyrý júıesin engizý qarsańynda bul sharalar úlken mańyzǵa ıe.
Naýqan kezinde tirkelý – bul óz qalaýyń boıynsha emhana tańdaý. Degenmen, elorda turǵyndary jyl aıaǵyna deıin emhanany birneshe jaǵdaıda aýystyrýǵa quqyly. Birinshiden, adamnyń turǵylyqty jeri bir aıdan astam ýaqytqa ózgerse, ekinshiden, emhana qaıta uıymdastyrylsa jáne ol qordyń qyzmet jetkizýshileri qatarynan shyǵyp ketse, tirkeýdi aýystyrýǵa múmkindik bar. Tipti, eshbir sebepsiz jylyna bir ret turǵylyqty jeri aımaǵynda emhanany aýystyrýǵa bolady.
Eskeretin jaıt, jańadan tańdaǵan emhanaǵa 2020 jyldyń 1 qańtarynan bastap barýǵa bolady. Jyldyń sońyna deıin turǵyndarǵa burynǵy BMSK qyzmet kórsete beredi.
Tirkelý naýqany TMKKK sheńberinde jáne MÁMS júıesinde medıtsınalyq qyzmet kórsetýge úmitker densaýlyq saqtaý sýbektileriniń derekter bazasynda tirkelgen emdeý mekemeleri arasynda ǵana júrgiziledi.
Derekter bazasy týraly aqparatty Áleýmettik medıtsınalyq saqtandyrý qorynyń saıtynan qaraýǵa bolady.
