Elordalyqtar Dúnıejúzilik densaýlyq kúnin atap ótýde
ASTANA. 7 sáýir. QazAqparat - Búgin Astanadaǵy «Jastar» saraıynyń alańynda Dúnıejúzilik densaýlyq kúnine arnalǵan «Belsendi jáne uzaq ómir súr!» atty aktsııa ótip jatyr.
Bıylǵy densaýlyq kúniniń basty taqyryby - «Jaqsy densaýlyq ǵumyrǵa jas qosady» atty uranmen uıymdastyrylyp otyr.
Aıta keteıik, dúnıejúzilik osy ataýly kún Qazaqstanda jyl saıyn atap ótiledi. Ómir súrý sapasyn jáne uzaqtyǵyn jaqsartý úshin densaýlyq saqtaý men nyǵaıtý qaǵıdattary týraly halyqty aqparattandyrýdy arttyrý maqsatynda medıtsına uıymdarynda ashyq esik kúnderi uıymdastyrylmaq.
«Meniń Astanada jumys istep jatqanyma bir jyl boldy. Osy oraıda aıtarym, Qazaqstanda densaýlyq saqtaý salasynda eleýli baǵdarlamalar men qadamdar jasalyp jatyr. Eń bastysy el azamattaryna densaýlyq emhalarda emes, kerisinshe úıdegi jáne qoǵamdaǵy salaýatty ómir saltynan bastalatynyn túsindirý kerek. Sondyqtan da, uzaq ǵumyr keshý jolynda ómir súrý sapasyna nazar aýdarý qajet», - dep atap ótti elordadaǵy aktsııa barysynda Dúnıejúzilik densaýlyq saqtaý uıymynyń Qazaqstandaǵy ókili Melıta Výınovıch.
