Elordalyqtar bir qysta qansha kómir jaǵady
ASTANA. QazAqparat - Aǵymdaǵy jyly elordanyń jylý berý maýsymyna qajetti kómir kólemi 400 myń tonnany quraıdy. Bul týraly búgin Astana qalalyq Otyn-energetıkalyq kesheni jáne kommýnaldyq sharýashylyǵy basqarmasy basshysynyń orynbasary Baǵdat Baısadyqov aıtty, dep habarlaıdy QazAqparat tilshisi.
«Jylytý maýsymynda Astanaǵa qajetti kómirdiń kólemi 400 myń tonnany quraıdy. Mundaı kómir kólemin satýshylar tolyqtaı qamtamasyz ete alady. Aıta keterligi, atalǵan kólemge Jylý elektr stansalaryna ketetin kómir esepke alynyp otyrǵan joq. Bul tek jeke sektor qajettiligi», - dedi ol.
Sonymen qatar basqarma basshysynyń orynbasary jylytý maýsymyna qansha qarajat bólingendigin de atap ótti.
«Bıýdjet jyldyń basynan sońyna deıin bólinedi. Kelesi jylǵy bıýdjetti qazir qalyptastyryp jatyrmyz. Kelesi jylǵa arnalǵan memlekettik satyp alý jospary shamamen jyldyń sońynda bekitiledi. Al osy jyldyń sońyna deıin shamamen 6 mlrd teńge josparlanǵan», - dedi Baǵdat Baısadyqov.
Onyń aıtýynsha, Astanadan kelip kómirdi Qoıandy, Talapker, Qaraótkel, Qosshy, Qajymuqan aýyldarynyń turǵyndary satyp alady.
«Olardyń arasynda alypsatarlar da, turǵyndar da bar. Ókinishke oraı búgingi kúni kómir kenishterinen qatty otyndy tutynýshylarǵa deıin jetkizý zańnamalyq deńgeıde rettelmegen. Bul jergilikti atqarýshy organdarǵa da, ortalyq organdarǵa da bekitilmegen», - dedi basqarma basshysynyń orynbasary.
Sonymen qatar Baǵdat Baısadyqov elordada 20 táýlikke jetetin otyn qorynyń bar ekendigin aıtqan bolatyn. Al Astana qalalyq otyn-energetıkalyq kesheni jáne kommýnaldyq sharýashylyǵy basqarmasynyń bólim bastyǵy Maqsat Ysmaǵulov kómir alypsatarlarymen kúres júrgizilip jatqanyn atap ótti.
