Elordalyqtar aldynda shyǵarmashylyq jeke kontsertimdi qoısam degen armanym bar - sazger Qaırat Nurtazın

Aıta ketý kerek, Qaırat Nurǵazın óner súıer qaýymǵa áıgili «Arman jyrym - arýlarym» ánimen jaqsy tanymal. Sózin aqyn Jolbarys Baıazıtov jazǵan bul án «Qyzdarǵa ásemdik jarasady» dep bastalǵannan-aq kórermenniń júregin jaýlap alady. Qaırattyń «Jubaıyma», «Bı keshinde», «Aq peıildi dosyma» ánderi de elge tarap ketti. Q.Nurǵazın 1993 jyly «Úkili úmit» respýblıkalyq baıqaýyna qatysyp, «Kórermender kózaıymy» júldesine ıe boldy. Al 1995 jyly ótken «Úkili úmitte» bas júldeni jeńip aldy.

«Aqyn dosym, zamandasym Aıbatyr Seıtaqtyń jańa jyrlaryn oqyp, aıta almaı júrgen oılarymdy taptym. Adam taǵdyrynyń qyzyq ta qýanyshty sátterinen biraz uqsastyqtardy baıqadym. Jańa ánniń áýeni túnde kelip, uıqym shaıdaı ashyldy. Gıtaramdy qolyma alyp, bólek bólmege baryp, án áýenin keltirýmen aınalystym. Sóıtip, tańǵy saǵat altyda «Sen áli ǵashyqpysyń?» degen jańa án dúnıege keldi. Qandaı qupııasy bar ekenin bilmeımin, ishki sezimimnen týdy. Jaqsy sóz izdep júrgenime kóp bolyp edi. Halyqty qýantatyn ánder týsa, sazger úshin odan asqan baqyt bar ma?»,- deıdi Qaırat Nurǵazın.

Bul ánge adamnyń ǵashyqtyq sezimi, jastyq shaqqa degen saǵynyshy arqaý bolǵan.

«Shynyńdy aıtshy, sen áli ǵashyqpysyń?
Synap kórgiń keldi me baqyt kúshin?
18-de qaǵyp em esigińdi,
45-ke kelgende ashyp tursyń!», -

dep bastalatyn án joldary jalyndy jastyq shaqtyń alaýlaǵan kúnderi, erekshe oqıǵalary tańǵy tús sekildi este qalatynyn baıandaıdy.

Sonymen qatar sazger jýyrda «Kim kináli», «Syr aqtarar sát keler» jáne «Bir belgi» degen jańa ánder jazdy.

Sazger aldaǵy josparlary týraly aıtqanda, Qostanaı óńirinde jıi kesh ótkizip júrse de, Kongress-Holl sekildi keń saraıda Astana jurtshylyǵymen kezdeskisi keletinin jetkizdi. «Elordalyqtar aldynda shyǵarmashylyq jeke kontsertimdi qoısam degen armanym bar. Osy sharanyń uıymdastyrý máselelerimen aınalysyp júrmin», - deıdi.