Elordalyq jýrnalısterdiń materıaldary kitap bolyp basylyp shyǵady
ASTANA. QazAqparat - Elordanyń 20 jyldyǵyn merekeleýdiń aıasynda jergilikti gazetter «Astana aqshamy» men «Vechernıaıa Astana» betterinde jarııalanǵan materıaldardyń negizinde eki tilde elordanyń kúndelikti tirshiligi men ár jyly ótken mańyzdy da qyzyqty sharalar týraly kitaptar baspadan shyǵady, dep habarlaıdy Astana qalasy ákimdiginiń resmı saıty.
Joba jetekshisi Qaısar Jumabaıuly materıaldar baspaǵa berilmes buryn kóptegen jumystardyń atqarylǵanyn aıtady.
«Mundaı kitaptardy shyǵarý ıdeıasy birneshe jyl buryn paıda boldy. «Astana aqshamy» men «Vechernıaıa Astana» gazetteriniń burynǵy nomerlerindegi materıaldardy oqı otyryp, men qalanyń qalaı óskendigi, ondaǵy qurylystyń qalaı júrgizilgeni, onyń damý qarqyndylyǵy, túrli keń-aýqymdy saıası, mádenı is-sharalar týraly qyzyqty materıaldarmen tanystym, qundy fotosýretterdi kórdim. Astana turǵyndary úshin 20 jyl ishinde elordamyzdyń qalaı ózgergendigin kórý qyzyq bolady dep oılaımyn. Eń aldymen bul materıaldardy gazetterimizdiń betterinde arnaıy aıdarmen jarııalaýdy jón sanadyq. Jyl basynan gazetterimizdiń 20 nómirin belgili bir jyly jazylǵan materıaldarǵa arnadyq. Endi mine kitaptarymyzdyń baspadan shyqqanyn kútip otyrmyz», - deıdi «Elorda Aqparat» JShS-niń dırektory Qaısar Jumabaıuly.
Ol, sondaı-aq, ár kitaptyń biregeı ekendigin alǵa tartty.
«Qazaq tilinde shyǵatyn kitap «Astana aqshamy» gazetindegi materıaldarǵa, orys tilindegi kitap «Vechernıaıa Astana» gazetindegi materıaldarǵa negizdelgen. Bir qaladaǵy sharalar bolǵan soń, eki kitaptaǵy materıaldar uqsas bolýy múmkin, árıne. Desek te, bul aýdarma emes. Bul - ár túrli jýrnalısterdiń jazǵan maqalalary. Kitaptyń ataýlary áli bekitilgen joq. Olar «Elorda shejiresi» jáne «Serdtse moe - Astana» degen ataýmen shyǵady dep josparlap otyrmyz», - dep bólisti Qaısar Jumabaıuly.
Aıta keteıik, jospar boıynsha Astananyń 20 jyldyǵyna oraı basyp shyǵarylatyn kitaptar osy jyldyń qarasha aıynda tanystyrylmaq.
