Elordalyq jumys berýshiler úshin múgedekterge arnalǵan jumys oryndarynyń kvotasy belgilendi
ASTANA. QazAqparat - Astana qalasynyń ákimdigi jumys berýshiler úshin múgedekterge arnalǵan jumys oryndarynyń kvotasyn anyqtaýdy qaýly etti.
Qalalyq bılik elordalyq jumys berýshiler úshin múgedekterge arnalǵan jumys oryndaryna kvotalar belgileýdi qaýly etti. Bul týraly Qoǵamdyq keńestiń kezekti otyrysynda málim boldy. Otyrys barysynda 5 normatıvtik quqyqtyq aktiniń jobasy qaraldy. «Astana qalasyndaǵy jumys oryndarynyń kvotalaryn belgileý týraly» jobasy jaıly Astana qalasy ákimdiginiń «Jumyspen qamtý ortalyǵy» KMM dırektory Oljas Omar baıandama jasady. Qaýly jobasymen múmkindigi shekteýli jandardy jumys ornymen qamtamasyz etý qarastyrylǵan. Eger ujym quramynda elý jáne odan da kóp adam esepte bolsa, onda múmkindigi shekteýli jandardyń sany 2%-dy quraýy qajet. 101-den 250 adamǵa deıin - jumysshylardyń tizimdik sanynyń 3%-y mólsherinde, eger kásiporyn ujymy 251 adamnan joǵaryny quraǵan jaǵdaıda, múgedekterge arnalǵan jumys kvotasy jumysshylar sanynyń 4%-yn quraıdy.
Sonymen qatar, jobada astanalyq jumys berýshilerge jumys oryndaryn usyný qajet bolatyn tulǵalardyń sanaty kórsetildi. Olardyń arasynda bas bostandyǵynan aıyrý oryndarynan bosaǵan probatsııa qyzmetiniń esebinde turatyn adamdar da bar. Jumys kvotasy jumys ornynyń jalpy sanynyń 1% mólsherinde belgilendi. Jastardy jumyspen qamtý máselesi kórsetildi. Kásiporyn basshylary bilim berý uıymdarynyń bitirýshileri bolyp tabylatyn, ata-anasynan aırylǵan nemese kámelettik jasqa jetkenshe olardyń qamqorlyǵynsyz qalǵan jastar arasynan azamattardy jumyspen qamtý úshin jumys ornynyń jalpy sanynyń bir paıyzy mólsherinde jumys oryndarynyń kvotasyn belgileý qajet.
