Elordalyq jolaýshylar avtobýstyń ishine ish kıim jaıdy - kompanııa mán-jaıdy baıandady
ASTANA. QazAqparat – Elordalyq jolaýshylar avtobýstyń ishine jip tartyp, ish kıimder jaıǵan. Bul oqıǵanyń beınejazbasy áleýmettik jelilerde taraldy. CTS kompanııasy atalǵan jaıttyń qaı baǵyttaǵy kólikte jáne qalaı bolǵanyn málim etti, dep habarlaıdy QazAqparat tilshisi.
«Qyzmettik tekserý barysynda CTS Kólik baqylaý departamentiniń jumyskerleri bul árekettiń №21 baǵdarda bolǵanyn anyqtady. Mán-jaıdy naqtylaý úshin avtobýs salonyndaǵy kameralardan beınematerıaldar alyndy. Beınejazbany qaraý kezinde belgili bolǵany, saǵat 20:29-da «Astana saıabaǵy» aıaldamasynan otyrǵan jolaýshylar avtobýs salonynda asyǵys túrde jip tartyp, kıimderdi ile bastaǵan. Kelesi «Ailand» otbasylyq demalys ortalyǵy aıaldamasyna jetkende ilingen jip pen zattaryn jınap alyp, avtobýstan shyǵyp ketken. Olardyń biri jáne keıbir jolaýshylar salonda bolyp jatqan jaıttyń barlyǵyn uıaly telefondaryna túsirgen», - delingen kompanııanyń resmı Іnstagram paraqshasynda jarııalanǵan málimette.
Kompanııa dereginshe, tıisti shara qoldaný úshin beınematerıal Astana qalasynyń polıtsııa departamentine joldanǵan.
Eske salaı keteıik, 20 aqpan kúni jelilerde avtobýs salonynda jip tartyp, kıim ilgen vıdeo jarııalanǵan bolatyn. Bul beınematerıaldy kópshilik qyzý talqylady.
Vıdeodan alynǵan kadr
