Elordalyq jol ınspektorlary avtoparkterdi tekserýde
ASTANA. 29 qazan. QazAqparat - 29 qazan - 2 qarasha aralyǵynda Astana qalasy aýmaǵynda joldarda apattyq jaǵdaılardy tómendetý, Jol qozǵalysy erejelerin buzý jaǵdaılaryn boldyrmaý, jolaýshylar tasymalymen udaıy aınalysatyn júrgizýshiler arasynda kóliktik tártipti saqtaý maqsatynda «Avtobýs» jedel-aldyn alý sharasy ótkiziledi. Bul týraly astana.kz saıtyna ІІD Jol polıtsııasy basqarmasynyń baspasóz qyzmetinen habarlady.
Búgingi tańda elorda aýmaǵynda qoǵamdyq jolaýshylar tasymalymen aınalysatyndar sheńberindegi 9 kásiporyn 51 baǵyt boıynsha qyzmet kórsetedi jáne 942 avtobýsty paıdalanady. Jyl basynan beri Jol qozǵalysy erejeleriniń talaptaryn buzǵany úshin 2,5 myńnan astam qoǵamdyq kólik júrgizýshisi ákimshilik jaýapkershilikke tartyldy, sonyń ishinde qala ishinde udaıy jolaýshylar tasymalymen aınalysatyn 1,5 myńnan astam júrgizýshige qatysty ákimshilik is qozǵaldy.
Kóshe qıylysyn júrip ótý, apattyq jaǵdaı týyndatý, joldyń qarsy baǵytyna shyǵyp ketý, belgilengen jyldamdyq tártibin arttyrý sııaqty Jol qozǵalysy erejelerin buzý jaǵdaılary jıi oryn alady.
Jol polıtsııasy basqarmasynyń qyzmetkerleri jyl basynan beri qoǵamdyq kólik júrgizýshileriniń JQE buzýdyń 700 jaǵdaıyn tirkegen.
«Іs-shara aıasynda Jol polıtsııasy basqarmasynyń jol-tehnıkalyq ınspektsııa bóliminiń qyzmetkerlerimen qaladaǵy barlyq kólik kásiporyndaryndaǵy jolaýshylar tasymalymen aınalysatyn júrgizýshilerge nusqaýlar berilip, Jol qozǵalysy erejelerin saqtaý týraly suhbattar júrgizildi. Sonymen qatar, avtobýstardy baǵyttar boıynsha jiberý kezinde olardyń tehnıkalyq jaǵdaılary tekserildi», - delingen habarlamada.
