Elordalyq jeksenbilik mektepte ýkraın tiliniń kúni atap ótildi
ASTANA. Qarashanyń 2-si. QazAqparat /Oksana Mýsalaeva/ - Astanadaǵy ýkraın jeksenbilik mektebinde qarashanyń 1-inde ýkraın tiliniń kúni atap ótildi. «Bul mereke Ýkraınada jyl saıyn Nestor jylnamashynyń qurmetine atap ótiledi.
Zertteýshiler, ýkraın jazba tili dál osy jylnamashydan bastaldy dep sanaıdy», deıdi ýkraın jeksenbilik mektebiniń dırektory Lıýdmıla Pnevskaıa.
Ýkraın tili men jazýynyń kúni qarashanyń 9-ynda atap ótiledi, biraq bul kúni «Vatra» ulttyq-mádenı ortalyǵynyń janyndaǵy jeksenbilik mektepte oqıtyn balalar kanıkýlda bolatyndyqtan, atalmysh merekeni erterek atap ótý týraly sheshim qabyldanǵan.
Balalar óleń oqyp, ánder oryndady, jumbaqtar sheshti. Oqýshylardy merekemen aǵa býyn ókilderi - «Chervona kalyna» folklorlyq ansambliniń ártisteri de kelip quttyqtady.
«Vatra» ulttyq-mádenı ortalyǵynyń tóraǵasy Taras Chernega mektep muǵalimderine eńbekteri úshin alǵys aıtty jáne jınalǵan qaýymdy merekemen quttyqtady. Ýkraınanyń Qazaqstandaǵy Elshiliginiń hatshysy Marına Mıneeva men «ÝkrTransNafta» kompanııasynyń ókili Valentına Gaıdýkevıch qatysýshylarǵa óz syılyqtaryn tabys etti.
«Sizder Qazaqstanda turǵanymen, Ýkraınanyń bir bólshegi bolyp tabylasyzdar, sebebi sizderdiń aralaryńyzda ýkraın mádenıetin kózdiń qarashyǵyndaı saqtap otyrǵan, balalaryna ana tilderin úıretip júrgen adamdar bar», dedi V.Gaıdýkevıch óz sózinde.
