Elordalyq jekemenshik balabaqshalarda búldirshinderdi qorlaýdyń 17 deregi tirkeldi
Oqý jáne tárbıe protsesinde tárbıelenýshilerdiń densaýlyǵyna jeńil zııan keltirgeni úshin jekemenshik mektepke deıingi uıymdardyń qyzmetkerlerine qatysty 9 ákimshilik is qozǵaldy.
Jantúrshigerlik oqıǵa elordalyq «Satı» balabaqshasynda tirkeldi. Áleýmettik jelilerde «Satı» jekemenshik ınklıýzıvti balabaqshasynyń tárbıeshileri balanyń jylaǵanyna nazar aýdarmaı, búldirshinderdi buryshqa turǵyzyp, olarǵa fızıkalyq kúsh qoldanyp jatqany týraly vıdeo tarady. Tekserý nátıjesi boıynsha balabaqsha meńgerýshisine qatysty ákimshilik quqyq buzýshylyq týraly hattamalar toltyrylyp, qylmystyq is qozǵaldy. Sondaı-aq mektepke deıingi mekemeniń tıisti habarlamasyz jumys istegeni anyqtaldy.
Nur-Sultandaǵy «Majorik» balabaqshasy da habarlamasyz jumys istegen. Onyń basshylyǵyna qatysty ákimshilik is qozǵaldy.
Elordadaǵy basqa mektepke deıingi uıymdarda da balalarǵa qatygezdikpen qaraý faktileri anyqtaldy. «Erketaı» balabaqshasynda tárbıeshiler balany ájethanaǵa qamap tastaǵan, sonyń saldarynan bala dene jaraqatyn alǵan.
«Lily» ortalyǵynda bala basqa balany uryp-soqqan, biraq tárbıeshi jaǵdaıǵa esh kóńil aýdarmaǵan. «Alan» balabaqshasynda tárbıeshi balany uryp-soqqandyqtan jumystan shyǵaryldy. «BOTAQAN-2020» JShS-da aýtızm dıagnozy bar egizderdiń denesinen tistiń izderi tabylsa, «Baby Boom NurSultan» balabaqshalarynda balalar qoldaryn kúıdirip alǵan. Osyǵan uqsas keleńsiz oqıǵalar basqa balabaqshalarda da anyqtaldy.
«Qazir balabaqsha jumysyn bastap, balalardy qabyldaýy úshin kásipkerlerdiń ýákiletti organǵa habarlama joldaýy jetkilikti. Olardyń odan keıingi qyzmetin eshbir memlekettik organ rettemeıdi. Sonyń saldarynan sońǵy jyldary mektepke deıingi uıymdarda balalardyń quqyqtaryn buzý faktileri kóbeıdi. Olardyń keıbireýlerinde tárbıeshiler balalarǵa durys qaramaıdy, sanıtarlyq jáne órt qaýipsizdigi talaptary saqtalmaıdy, onymen qosa qyzmetkerlerdiń biliktiligi de kóńil kónshitpeıdi. Sol sebepti Oqý-aǵartý mınıstrligi balabaqshalarǵa lıtsenzııa berý tártibin qaıta engizýge bastama jasap otyr. Bul jerde jekemenshik ǵana emes, sonymen qatar memlekettik balabaqshalar da lıtsenzııa alady. Menshik nysanyna qaramastan balabaqshalar erekshe táýekel aımaǵyna jatady. Balalar erekshe qorǵaýdy qajet etedi, olar jasyna baılanysty shaǵym jasaı almaıdy jáne buzýshylyqtar týraly da aıta almaıdy. Sondyqtan lıtsenzııany engizý mektepke deıingi uıymdarda balalardyń qaýipsizdigin qamtamasyz etý, balalardyń tolyqqandy ósýi men damýy úshin qolaıly jaǵdaılar jasaýǵa eń tómengi talaptardy belgileýge múmkindik beredi. Kóptegen adal kásipker men jekemenshik balabaqshalar qaýymdastyǵynyń ózi bul bastamany qoldap, lıtsenzııa berý mektepke deıingi uıymdar jumysynyń sapasyn arttyrý quraldarynyń biri ekenin túsinip otyr», - dedi Oqý-aǵartý mınıstrligi Bilim jáne ǵylym salasyndaǵy sapany qamtamasyz etý komıteti tóraǵasynyń orynbasary Maıra Meldebekova.
