Elordalyq jastarǵa nashaqorlyqtyń zııany týraly aıtyldy
ASTANA. QazAqparat - S. Seıfýllın atyndaǵy qazaq agrotehnıkalyq ýnıversıtetinde birinshi kýrs stýdentterine esirtki zattarynyń zııany men ony saqtaǵany jáne taratqany úshin qylmystyq jaýapkershilik júkteletini týraly ınteraktıvti dáris ótkizildi. Bul týraly elorda ákimdiginiń resmı saıtynda habarlady.
Dáris jastardy nashaqorlyqtan qorǵaýǵa jáne salaýatty ómir saltyn saqtaýǵa tartýǵa baǵyttalǵan «Órmek» respýblıkalyq jedel aldyn alý is-sharasy aıasynda uıymdastyryldy.
«Joǵary jáne orta oqý oryndarynda dárister turaqty túrde ótkiziledi. Biz 7-den joǵary synyptar men stýdent jastardy qamtımyz. Dárister kanıkýl kezinde, balalar mektep janyndaǵy lagerlerde bolǵanda ótkizemiz, tabıǵat aıasyna birge shyǵamyz. Búgin quqyq buzýshylyqtardyń aldyn alý úshin birinshi kýrs stýdentterin, elordaǵa óńirlerden kelgenderdi jınadyq», - dedi Esirtki bıznesimen kúres basqarmasynyń bólim bastyǵy, polıtsııa podpolkovnıgi Sergeı Ilınyh.
Memlekettik organdardyń ókilderi qatysýshylarǵa sıntetıkalyq esirtkiniń zııandylyǵy men olardyń psıhıkaǵa áseri týraly aıtyp berdi, shylym qospalaryn paıdalaný kezinde bolatyn naqty psıhıkanyń buzylýy týraly beınerolıkter kórsetildi, sondaı-aq, QR esirtki qylmystary úshin jazany qatańdatý nysandary túsindirildi.
Kezdesý sońynda stýdentter jasyryn túrde óz suraqtaryn joldady.
Aıta keteıik, ústimizdegi jyldyń segiz aıynda esirtki qylmystary úshin 182 adam qylmystyq jaýapkershilikke tartyldy, esirtkini zańsyz saqtaýdyń jáne tutynýdyń 563 faktisi anyqtaldy.
