Elordalyq jasóspirim túngi ýaqytta dámhanada daıashy bolyp istegen
NUR-SULTAN. QazAqparat – Elorda dámhanalarynyń birinde túngi ýaqytta daıashy bolyp jumys istep júrgen jasóspirim anyqtaldy, dep habarlaıdy QazAqparat tilshisi.
«Polıtsııa qyzmetkerleri saǵat 23.00-den keıin «Palaý ortalyǵy« dámhanasyn tekserý barysynda túngi ýaqytta jumys istep júrgen kámelettik jasqa tolmaǵan jasóspirimdi anyqtady. Dámhana ákimshisinen jáne jasóspirimniń ózinen suraý barysynda onyń bir aıdan beri jumys istep júrgendigi anyqtaldy. Jasóspirim úıden tysqary jerde zańdy ókilderinsiz júrgeni úshin ata-anasy ákimshilik jaýapkershilikke tartyldy», - dep atap ótedi Nur-Sultan qalalyq Polıtsııa departamentinen.
Sonymen qatar QR Ákimshilik quqyq buzýshylyq týraly kodeksiniń 132-babyna sáıkes, dámhana ıesi túngi ýaqytta kóńil kóterý ornyna kámelettik jasqa tolmaǵan jasóspirimdi jibergeni úshin 15 AEK kóleminde ákimshilik jaýapqa tartyldy. Buǵan qosa, jasóspirim ýaqyt normasynan artyq jumys istep júrgen.
Jalpy, reıd barysynda polıtseıler bazarlarda azyq-túlik taýarlaryn satýmen aınalysqan jáne karantın jaǵdaıynda saǵat 08.00-den 16.00-ge deıingi aralyqta qoǵamdyq orynda bolǵan 10-nan astam kámeletke tolmaǵan jasóspirimdi anyqtady. Polıtsııa qyzmetkerleri barlyq fakti boıynsha balalardyń aty-jónin anyqtap, ata-analarymen túsindirý jumystaryn júrgizgen.
