Elordalyq jas kompozıtor Dımashqa án jazýdy armandaıdy

Nurıslam Dospaı Qazaq ulttyq óner ýnıversıteti janyndaǵy mýzykalyq mekteptiń 6-synybynda oqıdy. Ol 8 jasynan bastap án jazady jáne jaqynda alǵashqy avtorlyq jınaǵyn shyǵardy. Nurıslam túrli halyqaralyq jarystarǵa qatysyp, túrli marapattardy ıelengen. Jaqynda ol Reseı, Ýkraına, Frantsııa jáne Grekııa kompozıtorlary qazylyq etken «New music Generation -2019» birinshi halyqaralyq kompozıtorlar baıqaýy «Sımfonııalyq shyǵarma» nomınatsııasynda jeńimpaz atandy.

Nursılamnyń anasy Shynar Shoqpanova QazAqparat tilshilerine jas sazgerdiń shyǵarmashylyq joly týraly suhbat berdi.

«Shynymyzdy aıtsaq, onyń áýen jazýǵa qabiletin ózimiz de baıqamadyq. Nurıslam 1-2 synypty Nur-Sultan qalasynyń №37 orta mektebinde oqydy. Birinshi synyptan keıin ol mýzykalyq mektepte barǵysy keletinin, mýzykant bolǵysy keletinin aıtty. Sóıtip, mýzyka mektebine qujat tapsyrýdy jón kórdik. Biraq qabyldaýǵa úlgermeı, kelesi jylǵa qaldyq. Ekinshi synypta da Nursılam mýzykalyq mektepke barǵysyn keletinin aıtqanda, ony arnaıy mamandarǵa aparyp, mýzykalyq qabiletin tekserýdi uıǵardyq», - deıdi Shynar Shoqpanova.

Arnaıy tekserýlerden keıin mamandar balanyń mýzykalyq beıimin baıqap, tańdanysyn jasyrmaǵan. Nurıslamnyń mýzykalyq qabiletin 100 paıyzǵa baǵalap, mýzykalyq mektepke aýystyrýǵa keńes bergen.

«Emtıhandardy sátti tapsyrǵan soń, 8 jasar balany birden 3-synypqa qabyldady. Osymen úshinshi jyl Nurıslam mýzykalyq mektepte oqyp júr. Ol demalystyń ne ekenin umytty. Jazǵy, qysqy kanıkýldarda da bosańsyp ketpeýge tyrysady. Ony mektepte barlyǵy jaqsy kóredi. Týyndylaryn synaqtarda oınaıdy. Munyń barlyǵy ulymnyń eńbekqorlyǵynyń arqasynda shyǵar», - deıdi ana.

Nurıslamnyń eń alǵashqy týyndysy «Eki kóńil-kúı» dep atalady. Osy shyǵarmasy arqyly jas talant 2017 jyly Ǵ. Jubanova atyndaǵy baıqaýda «Jas kompozıtor» atalymynda І oryn alǵan. Bul shyǵarmany ıtalııalyq, ıspanııalyq mamandar, Keńes Dúısekeev syndy otandyq kompozıtorlar joǵary baǵalaǵan. 2019 jyly Nurıslam «Samal» halyqaralyq jas kompozıtorlar baıqaýynda Gran-prı alyp, Germanııa, Italııa, Ispanııa, Reseıden kelgen qatysýshylardy basyp ozdy. Osydan keıin balany Ispanııa men Reseıdegi mýzykalyq mektepter oqýǵa shaqyrǵan. Biraq, ata-ana jas balany ózge elderge jibermeýdi uıǵarǵan.

20 jyl buryn belorýssııalyq aqyn Vladımır Petrov «Astana-Qazaqstan» óleńin jazǵan edi. 2018 jyly Nursılam osy óleńge án jazyp, «Qazaqstan – bizdiń ortaq úıimiz» halyqaralyq festıvalinde «Úzdik vokal» júldesin jeńip aldy.

Suhbatqa kelgen Nurıslamnyń ózi túrli mýzykalyq shyǵarmalardy qalaı jazatynyn aıtyp berdi. Ol fortepıano men dombyrada jáne úrmeli aspaptarda oınaıdy.

«Aldymen oıymda bir melodııa paıda bolady. Sosyn tezirek úıge kelemin de nota dápterim men qarandashty alyp, sol áýendi fortepıanoda oınaımyn. Bárin jazyp alǵan soń, taǵy bir tekserip shyǵarmyn. Qajet tustaryn jóndeımin. Osylaı, dúnıege jańa týyndy keledi», - dedi Nurıslam.

Qazirgi ýaqytta jas kompozıtor qorjynynda 50-den astam án bar. Aspaptyq jáne vokaldyq týyndylaryn jınaqtap, «Balalyq shaqtyń sıqyrly áýenderi» (Volshebnye melodıı detstva) toptamasyn shyǵarǵan.

«Alǵashqy jınaqta «Ájemniń ertegisi», «Volshebnyı les», «Moı spınner», «Gıroskýter», «Vals vypýsknıkov» dep atalatyn 31 án bar. «Túlekter valsin» tórtinshi synypty aıaqtaǵanda synyptastar bıi úshin bir túnde shyǵardy. Aqpan aıynda ekinshi jınaqtyń tanystyrylymyn josparlap otyrmyz. Ondaǵy jumystardy tanymal mýzykant Erlan Kókeev kásibı túrde baǵalap, aqyl-keńesin aıtty. Barlyq jınaqty qarjymyzǵa shyǵardyq», - dedi Nurıslamnyń anasy.

Sonymen birge, Nurıslam kýmıri Dımash Qudaıbergenmen kezdesýdi armandaıtynyn aıtty.

«Meniń kýmırim – Dımash Qudaıbergen. Maǵan onyń daýsynyń dıapazony unaıdy. Barlyǵy onyń daýysyna tań qalady. Men de Dımash sekildi bolǵym keledi. Men Dımashpen Shabytta «Samal» kompozıtorlar baıqaýynda kezdestim, ekeýmiz sýretke tústik, shyǵarmalar týraly sóılestik. Ol únemi «Janym» dep sóıleıtin. Meniń shyǵarmalarymdy mindetti túrde qaraımyn dep ýáde berdi. Endi meniń armanym – Dımashqa án jazyp berý», - dedi Nurıslam Dospaı.

Aıta keteıik, aqpan aıynda Nur-Sultan qalasynda jas kompozıtor Nurıslam Dospaıdyń ekinshi shyǵarmalar jınaǵy tanystyrylady.