Elordalyq ustazdar «Pedagog mártebesi týraly» zańnyń artyqshylyqtaryn atady
№ 77 mektep-gımnazııada ótken dóńgelek ústel otyrysyna qala ákiminiń orynbasary Baqtııar Máken, elordalyq bilim berý uıymdarynyń basshylary men pedagogtary, «Ádilet» bilim berý qyzmetkerleri kásipodaǵynyń jáne ata-analar qaýymdastyqtarynyń músheleri qatysty.
Sharaǵa qatysýshylardyń biri, №22 «Álem» balabaqshasynyń ádiskeri Olga Geleverıa tárbıeshiler quqyǵy muǵalimdermen teń dárejede ekendigin atap ótti. Bul, pedagogıkalyq sheberligi úshin aqy tóleý jáne demalys merziminiń uzarýynan kórinis taýyp otyr.
«Zańda pedagogtar jalaqysyn osy jyldan bastap 25% arttyrý qarastyrylǵan. Bul, qýanyshty habar. Sebebi mektepke deıingi uıymdardaǵy pedagogtardyń jalaqysy joǵary emes. Sonymen qatar, tárbıeshilerge pedagogıkalyq sheberligi úshin jalaqy kólemine saı 30%-dan 50%-ǵa deıin aqy tólenetin bolady. Qazirgi kezde tárbıeshiler muǵalimdermen teń quqyly. Sondaı-aq, mektepke deıingi uıymdar ustazdaryna demalys merzimi 56 kúnge deıin uzardy. Odan bólek, pedagogtarǵa negizsiz til tıgizgeni úshin aıyppul qarastyrylǵan», - dedi Olga Geleverıa.
Sondaı-aq, jańa zań týraly pikirimen Kólik jáne kommýnıkatsııa kolledjiniń dırektory, máslıhat depýtaty Zýlfýhar Gaıpov bólisti.
«Zańnyń 8-babynyń 4-tarmaǵy kóńilimizden shyqty. Onda negizgi jumys orny memlekettik mekeme bolatyn pedagogtarǵa fılosofııa ǵylymdarynyń doktory dárejesi, sondaı-aq ǵylym kandıdaty ǵylymı dárejesi úshin 17 AEK (45 myń teńge), ǵylym doktorlaryna 34 AEK (90 myń teńge) kóleminde aqy tólenedi dep aıtylǵan. Bul pedagogtar úshin úlken yntalandyrý», - dedi ol.
Qala ákimi orynbasarynyń aıtýynsha, «Pedagog mártebesi týraly» zań – pedagogıkalyq qaýymdastyqtyń bedeli men elimizdegi árbir pedagogtyń rólin nyǵaıtýǵa baǵyttalǵan mańyzdy qadam.
«Pedagogtardyń jaǵdaıyn jaqsartatyn barlyq normalar bekitildi. Mamandyq jastar men óskeleń urpaq úshin tartymdy bolady. Qazirgi ýaqytta kadrlardyń jetispeıtinin eskersek, bul ózekti másele. Bul zań jastardy yntalandyrýǵa múmkindik beredi», - dedi Baqtııar Máken.
Ákim orynbasary zańda pedagogtardyń kásibı qyzmetindegi quqyqtary men mindetteri egjeı-tegjeıli kórsetilgenin, sondaı-aq materıaldyq qamtamasyz etý, kótermeleý men áleýmettik kepildikterge qatysty normalardy qamtıtynyn atap ótti.
«Pedagogtarǵa halyqaralyq olımpıada júldegerleri úshin úsh laýazymdyq jalaqy mólsherinde bir jolǵy syıaqy túrinde kótermeleý qarastyrylǵan. Sondaı-aq, aýyldyq jerlerdegi oqytýshylarǵa jer ýchaskesine basym quqyq berilgen. Árbir bap normatıvtik-quqyqtyq aktilermen bekitilgen. Olar is júzinde oryndalady, qaǵaz betinde qalmaıdy. Atalmysh normalar balalarmen jumys isteıtin barlyq tulǵalarǵa qatysty», - dedi ol.
Óz baıandamasyn Baqtııar Máken uly aqyn Abaı Qunanbaevtyń qara sózimen qorytyndylady. «Memleket basshysy Qasym-Jomart Toqaevtyń «Abaı jáne HHІ ǵasyrdaǵy Qazaqstan» atty maqalasy jaryq kórdi. Maqala óz ýaqytynda der kezinde shyqty jáne mańyzdy dep sanaımyn. Sebebi, uly aqynnyń arqasynda biz búginde ustazdyqtyń jaqsylyǵyn túsinip otyrmyz. Ol kisiniń «Adamnyń adamgershiligin jaqsy ustazynan bilýge bolady» degen jaqsy sózi bar», - dep sózin túıindedi ákim orynbasary.
Aıta ketsek, «Pedagog mártebesi týraly» QR zańy 2019 jyldyń 30 jeltoqsanynda qabyldandy.
